Sviss: 68% kjósenda vilja setja skorður við ofurlaunum og starfsloka­greiðslum til stjórnenda

Tæplega 68% kjósenda í Sviss samþykktu að settar skyldu strangar reglur um laun forstjóra fyrirtækja. Í þjóðaratkvæðagreiðslu sunnudaginn 3. mars var samþykkt að hluthafar hefðu neitunarvald við ákvarðanir um kaupauka og að sett skyldi bann við háum aukagreiðslum til nýrra og fráfarandi forstjóra.

Andstæðingar nýju ákvæðanna um laun stjórnenda sögðu að samþykkt þeirra mundi skaða samkeppnishæfni Sviss. Fréttaskýrendur segja hins vegar að almenningur í Sviss sætti sig ekki við vaxandi bil í kjörum fólks í landinu.

Meirihluti kjósenda í öllum 26 kantónum Sviss studdi nýju, ströngu reglurnar. Alls sögðu 1,6 milljón kjósenda „já“ en 762.000 sögðu „nei“.

Imogen Foulkes, fréttaritari BBC, í Bern segir að milljarða tap UBS, stærsta banka Sviss, og uppsagnir þúsunda manna hjá lyfjafyrirtækinu Novartis hafi vakið reiði í Sviss, því að erfiðleikar fyrirtækjanna höfðu engin áhrif á há laun og kaupauka stjórnenda. Fréttaritarinn segir að leitun verði að landi í heiminum sem hafi strangari reglur á þessu sviði en Sviss.

Hluthafar munu hafa neitunarvald varðandi laun, starfslokagreiðslur verða bannaðar og þeir stjórnendur sem fara á svig við reglurnar eiga á hættu að verða handteknir og dæmdir í fangelsi.

Hin nýju ákvæði verða sett í stjórnarskrá Sviss og þau munu ná til allra svissneskra fyrirtækja sem eru skráð í kauphöll Sviss.

Thomas Minder, atvinnurekandi sem sneri sér að stjórnmálum, er höfundur þessara nýju ákvæða og helsti hvatamaður þjóðaratkvæðagreiðslu um þau.

Í febrúar 2013 var skýrt frá því að Daniel Vasella, fráfarandi forstjóri Novartis, mundi fá 72 milljónir svissneskra franka (9,5 milljarða ISK) á næstu sex árum í greiðslu til að koma í veg fyrir að hann hæfi störf hjá samkeppnisaðila Novartis. Síðar var fallið frá greiðslunni vegna reiði almennings.