Olíuleit: Shell heldur sig frá Norður-Íshafi á árinu 2013

Shell hefur ákveðið að falla frá öllum áformum um olíuleit í Norður-Íshafi á árinu 2013. Kostnaður við olíuleit á norðurslóðum er of hár að mati félagsins auk þess sem það hefur orðið fyrir tapi vegna skaða á olíuborpalli. Frá þessu er skýrt í The Wall Street Journal.

Marvin Odum, forstöðumaður leitardeildar Shell, segir að leitarhléð megi rekja til endurmats á verkefni sem vakið hefur deilur meðal umhverfisverndarsinna.

Kulluk frá Shell strandaður við Alaska

„Okkur hefur miðað vel i Alaska en þetta er langtímaverkefni sem unnið er að á öruggan og yfirvegaðan hátt,“ segir Marvin Odum. „Ákvörðunin um að gera hlé á árinu 2013 gefur okkur tóm til að ráðgast við samstarfsaðila okkar og endurbæta tækjabúnað eftir átökin á árinu 2012.“

Árið 2012 var Shell erfitt í ýmsu tilliti og undir lok þess slitnaði fljótandi borpallurinn Kulluk og strandaði við Kyrrahafsströnd Alaska. Engin olía lak og það tókst eftir fáeina daga að ná pallinum aftur á flot. Árásir dundu hins vegar á fyrirtækinu sem var meðal annars sakað um að láta skattareglur ráða viðbrögðum sínum.

Kröfur um öryggisráðstafanir af hálfu olíufélaga hertust til muna eftir olíuslysið í Mexíkó-flóa 2011. Þetta hefur kallað á mikinn kostnað fyrir olíufélögin til dæmis vegna kröfu um að vara-borpallur sé í nágrenni við vinnslupallinn svo að unnt sé að grípa tafarlaust til björgunaraðgerða fari eitthvað úrskeiðis.

The Wall Street Journal segir að Shell hafi nú þegar varið 4,5 milljörðum dollara við rannsóknir og leit á norðurslóðum án þess að hefja nokkra vinnslu.