Spenna í viðskiptum Kína og ESB magnast - Kínverjar hóta gagnaðgerðum

Kínversk stjórnvöld hafa hvatt ESB til að falla frá áformum um frekari viðskiptahindranir eða taka afleiðingum gjörða sinna. Á þennan hátt bregðast Kínverjar við refsitollum sem ESB hefur lagt á sólarrafhlöður frá Kína og tilraunum ESB til að hefja rannsókn á kínverskum símtækjum.

Shen Danyang, talsmaður kínverska viðskiptaráðuneytisins, sagði á reglulegum fundi með fjölmiðlamönnum fimmtudaginn 16. maí að tilraunum Evrópusambandsins til að setja kínverskum útflytjendum steininn fyrir dyrnar yrði mætt með „markvissum“ aðgerðum í því skyni að verja réttmæta kínverska hagsmuni.

„Sá aðili sem stofnar til vandræða verður að taka afleiðingum þess,“ sagði talsmaðurinn og vísaði þar til nýlegra áforma sem framkvæmdastjórn ESB hefur kynnt í því skyni að koma í veg fyrir kínversk undirboð vegna ýmiss varnings.

Framkvæmdastjórnin hefur í bígerð að leggja allt að 68% refsitolla á sólarrafhlöður og búnað tengdum þeim frá Kína. Eru yfirvöld í Peking sökuð um að grafa undan heimsmarkaðsverði með háum ríkisstyrkjum.

Þá skýrði framkvæmdastjórn ESB frá því miðvikudaginn 15. maí að hún mundi hefja rannsókn á hvort kínversk farsímafyrirtæki hefðu stundað ólögmætt undirboð á ESB-markaði.

Shen benti á að evrópsk fyrirtæki hefðu miklu meiri markaðshlutdeild á kínverskum síma- og fjarskiptamarkaði en kínversk fyrirtæki innan ESB og hvers kyns afskipti eða íhlutun í starfsemi kínverskra fyrirtæki gæti orðið báðum aðilum til tjóns. Hann sagði hins vegar að Kínverjar hefðu engan áhuga á viðskiptastríði við ESB.

Opinberar tölur frá Brussel sýna að Kínverjar selja síma- og fjarskiptatæki ár hvert til ESB fyrir einn milljarð evra. Sala Kínverja á sólarrafhlöðum og tengdum búnaði til ESB nemur um 22 milljörðum evra á ári, Kínverjar flytja hins vegar inn búnað og efni tengt sólarrafhlöðum fyrir 7,5 milljarða evra á ári frá ESB.

Heimild dw.de