Kínverjar segjast ætla að verja fullveldi sitt á höfunum - minna Frakka á að Frakkland sé í Evrópu

Næst æðsti yfirmaður Alþýðuhers Kína sagði í ræðu á Shangri-La öryggismálaráðstefnunni í Singapúr sunnudaginn 2. júní að flotaæfingar Kínverja á umdeildum hafsvæðum í Austur- og Suður-Kínahafi hefðu þann tilgang að tryggja fullveldisrétt Kína á hafsvæðunum.

Kínversk herskip

„Afstaða okkar til Austur-Kínahafs og Suður-Kínahafs er að þau lúti fullveldi Kína,“ sagði Qi Jianguo undir-hershöfðingi með aðstoð túlks. „ Þetta er alveg skýrt af okkar hálfu. Þess vegna er ekkert ólögmætt eða óljóst í sambandi við kínversk herskip á þessum slóðum og eftirlitsstörf þeirra.“

Hér er um að ræða deilur Kínverja við Japana um Senkaku-eyjar, sem Kínverjar kalla Diayou, í Austur-Kínahafi. Í Suður-Kínahafi er talið að finna megi olíu og gas. Þar deila Kínverjar um yfirráð við stjórnvöld í Brunei, Malaysíu, á Filippseyjum og í Vítenam.

Nágrannaþjóðum Kínverja stendur æ minna á sama um yfirlýsingar stjórnvalda í Peking og kínverska hersins um áform sín á höfunum við strendur Kína. Qi lét þó orð falla til að draga úr ótta þessara þjóða þegar hann sagði: „Kínverjar hafa aldrei haft það á stefnuskrá ríkisins að leggja undir sig erlend svæði með hervaldi.“

Alþjóðahermálastofnunin í London, (IISS), hefur í 12 ár haldið árlega ráðstefnu í Singapúr, Shangri-La-ráðstefnuna, um öryggismál á Kyrrahagssvæðinu og í Asíu. Þangað koma stjórnmálamenn, hershöfðingjar og herfræðingar frá öllum heimshornum.

Chuck Hagel, varnarmálaráðherra Bandaríkjanna, situr ráðstefnuna að þessu sinni. Árið 2011 kynnti Bandaríkjastjórn áform sín um að stórauka návist herafla síns á Kyrrahafi og í Asíu. Kanadastjórn sendi Peter Mackay varnarmálaráðherra til Singapúr. Hann benti í ræðu sinni á að frá Kanada væru fleiri stjórnarerindrekar í löndunum við Kyrrahaf en í nokkrum öðrum heimshluta.

Chaterine Ashton, utanríkismálastjóri ESB, situr ráðstefnuna í Singapúr og er það í fyrsta sinn sem svo háttsettur fulltrúi ESB sér ástæðu til að taka þátt í henni. Þá eru þar einnig Philip Hammond, varnarmálaráðherra Breta, og Jean-Yves Le Drian, varnarmálaráðherra Frakklands.

Franski varnarmálaráðherrann lét þess getið í ræðu sinni að Frakkar ættu hagsmuna að gæta í Asíu og á Kyrrahafi vegna yfirráða yfir eyjum á svæðinu. Fréttaritari Le Monde á fundinum segir að þessi ummæli ráðherrans hafi ekki fallið í góðan jarðveg hjá Li Ji, flotaforingja frá Kína, sem hafi einfaldlega sagt. „Í okkar augum er Frakkland í Evrópu!“ Kínverjar vildu greinilega ekki að Frakkar létu að sér kveða hernaðarlega á Kyrrahafi eða í Asíu.

Í Le Monde segir að franski ráðherrann hafi lagt sérstaka áherslu á tölvuöryggi og Shangri-La ráðstefnan hafi að verulegu leyti snúist um það. Bandaríkjamenn telja að Kínverjar (kínverski herinn?) hafi hvað eftir annað gert tölvuárásir á bandarísk tölvukerfi. Þá var nýlega skýrt frá rannsókn í Ástralíu sem leiddi til ásakana í áströlskum blöðum um að Kínverjum hefði tekist að stela teikningum af nýrri byggingu fyrir áströlsku leyniþjónustuna.

Heimild: dw.de – Le Monde