iPhone notar meiri raforku á ári en ísskápur

Rannsóknir sýna að iPhone-sími notar meiri raforku á ári en ísskápur. Mark Mills hjá Digital Power Group segir að ísskápur noti að meðaltali 322 kiloWatt-stundir á ári en iPhone 361 kiloWatt.

Víðtækari rannsókn sýnir að tæki tengd tölvu- og upplýsingatækni noti samtals 1.500 teraWatt-stundir af raforku á ári, það er 10% heimsframleiðslunnar. Til að átta sig á hve mikið magn raforku þetta er má nefna að árið 1985 dugði hún til að veita orku til allra rafljósa sem kveikt voru í heiminum á því ári og sé litið nær í tíma dugar þessi orka fyrir Japani og Þjóðverja samtals á líðandi stundu.

Til að vekja athygli á hve hin nýja tækni er orkufrek nefnir The New York Times nýjan skýjakljúf Bank of America í New York til sögunnar. Þegar byggingin var tekin í notkun árið 2009 var henni hampað sem „grænustu“ byggingu heims. Vatnsnotkun í lágmarki á salernum, ljós stillt eftir birtustigi utan dyra og nýting á regnvatni. Allar þessar umhverfisvænu aðgerðir eru einskonar felubúningur utan um markaðssalina og hinar öflugu tölvur sem þjóna þeim sem þar starfa við skjá sem eru sífellt vakandi. Í byggingunni er notað tvisvar sinnum meiri orka en í Empire State-byggingunni sem er meira en 80 ára.

Stórfyrirtæki á sviði hinnar nýju tækni eru meðvituð um að þau verði sökuð um að gengið sé of nærri umhverfinu með raforku frá fordæmdum orkugjöfum. Apple leggur áherslu á að tilraunaver sín séu aðeins knúin af orku frá sjálfbærum verum. Facebook og Google reyna að opna miðstöðvar sínar í nágrenni við vatnsafls- eða vindorku- virkjanir. Flutningskerfi á raforku sem kallað er „smart grid“, snjall-dreifikerfi, er reist á upplýsingatækni til að unnt é að nýta orkuna sem best. Dugar þetta? Notendur þráðlausra kerfa voru 42,8 milljónir árið 2008 og talið er að þeir verði tæpur milljarður árið 2014. Nýmarkaðsþjóðirnar slást í hóp óseðjandi raforkufíkla og það verður að sjá þeim fyrir nægu rafmagni.

Heimild: Le Figaro