Frakkland: Ríkis­stjórnin vill banna litað blek í húðflúr

Franska ríkisstjórnin ætlar að beita sér fyrir banni við að notað sé litað blek við húðflúr (tattóveringar). Listamenn í greininni hafa efnt til mótmæla í franska þinginu. Þeir telja vegið að starfsheiðri sínum með því að vekja ótta meðal almennings án þess að nokkur vísindaleg rök liggi að baki áformum stjórnvalda.

Verði frumvarp ríkisstjórnarinnar samþykkt verður bannað að nota níu af tíu blektegundum á franska markaðnum. Aðeins verður heimilað að nota svart, hvítt, grátt og vissa tegund af bláu og grænu bleki.

ANSM, frönsk stofnun sem á að gæta heilsuöryggis, hefur tekið undir þá skoðun samtaka húðsjúkdómalækna að litað blek við húðflúr ýti undir hættu á sýkingu, ofnæmi og jafnvel krabbameini.

Forystumenn húðflúrara segja að ekki sé unnt setja bann í Frakklandi einu það verði að skoða málið á vettvangi ESB og komast að sameiginlegri niðurstöðu þar. Þá verði bannið til þess að hrekja þá sem vilji láta tattóvera sig til þeirra sem selja muni þjónustu sína á svörtum markaði og þar með auka hættuna á sjúkdómum. Loks sé með öllu fráleitt að ganga á þennan hátt á rétt þeirra einstaklinga sem vilji að listamenn skreyti líkama þeirra og noti til þess liti að ósk viðkomandi.

Könnun sem gerð var í Frakklandi árið 2010 sýnir að 10% fullorðinna Frakka vilja hafa að minnsta kosti eitt húðflúr á líkama sínum, hlutfallið hækkar í 20% meðal þeirra sem eru á aldrinum 25 til 34 ára. Á 11 dögum tókst einum tattó-meistara að safna 110.000 nöfnum á lista gegn banninu.

Atlagan gegn húðflúr-litum er aðeins einn liður í aðgerðum frönsku ríkisstjórnarinnar og stuðningsmanna hennar á þingi til að banna ýmsar vörur eða leggja á þær ofurgjöld í því skyni að stuðla að meira heilbrigði þjóðarinnar.

Í október boðaði ríkisstjórnin bann á nokkrum tegundum ilmkerta og reykelsis. Þá hefur franska þingið samþykkt sérstakan skatt á orkudrykki eins og Red Bull. Þá hefur verið sagt frá áformum um ný gjöld á rafrettur, sætur og bragðbætt vín til að draga úr neyslu þeirra.

Heimild: The Local