Af hverju styður VG einræðisöflin í Arabalöndum?

Flokksráðsfundur Vinstri grænna fordæmir loftárásir Atlantshafsbandalagsins á stöðvar Gaddafís, einræðisherra í Líbýu. Þetta er athyglisvert.

Þessar loftárásir hófust eftir ítrekaðar hjálparbeiðnir uppreisnarmanna gegn einræðisstjórn Gaddafís um hjálp, þegar fyrirsjáanlegt var að Gaddafí mundi beita öflugum her sínum til að murka lífið úr andstæðingum sínum og strádrepa þá. Aðildarríki Atlantshafsbandalagsins voru sum treg til, ekki sízt Bandaríkin, en treystu sér greinilega ekki til þess að sitja aðgerðarlaus hjá og horfa upp á manndrápin.

Þetta var svipuð staða og kom upp á Balkanskaga fyrir tæpum tveimur áratugum. Þar drap hver annan, fjöldanauðganir stóðu yfir og börn myrt. Evrópuríkin reyndust þess vanmegnug að stilla til friðar. Það tókst ekki fyrr en Bandaríkjamenn létu til skarar skríða.

Uppreisnin í Líbýu hófst eftir að uppreisnin í Túnis hafði breiðst út til Egyptalands og ráðandi öflum í báðum þeim ríkjum steypt af stóli. Síðan hafa mótmælin breiðst út til Sýrlands og reyndar fleiri landa í þeim heimshluta. Í Sýrlandi er nú talið að búið sé að drepa um 1000 manns í mótmælunum þar.

Samþykkt VG er ekki hægt að skilja á annan veg, en flokkurinn telji rétt að Vesturlönd sitji hjá og horfi á einræðisherrana drepa sitt fólk og alla þá, sem hafa aðra skoðun en þeir sjálfir í Arabalöndunum.

Með því að yfirfæra þessa afstöðu á atburði fyrri tíðar hefðu VG-menn þá væntanlega verið andvígir því að Bretar kæmu Pólverjum til hjálpar við upphafi heimsstyrjaldarinnar síðari og talið eðlilegt að Adolf Hitler hefði frjálsar hendur um að drepa alla þá Pólverja, sem hann gat náð til.

Ætli þetta mál hafa verið rætt alveg í botn á flokksráðsfundi VG?

Ef svo var er ekki hægt að líta á afstöðu Vinstri grænna á annan veg en þann að flokkurinn styðji einræðisöflin í Miðausturlöndum.

Af hverju?