Evrópu­vaktin fær styrk frá alþingi - sætir ómaklegri árás frá Pressunni

Alþingi auglýsti eftir umsóknum styrki í 27 milljón króna sjóð sem þingið stofnaði til að stuðla að „opinberri og upplýstri umræðu um Evrópusambandið“ og forsætisrnefnd alþingis skipaði nefnd til að úthluta þessu fé. Nefndinni bárust umsóknir frá 28 aðilum. Í úhlutunarnefndinni sátu fyrrverandi rektorar íslenskra háskóla, Sveinbjörn Björnsson, fyrrverandi rektor Háskóla Íslands, var formaður úthlutunarnefndar.

Evrópuvaktin sótti um styrk úr þessum sjóði og var einn þriggja umsækjenda sem hlaut styrk. Hinir eru Já Ísland og Heimssýn.

Í bréfi sem Evrópuvaktinni barst þegar henni var tilkynnt um styrkinn segir:

„Sótt var um styrki til fjölbreyttra verkefna og gætti úthlutunarnefnd þess sérstaklega við úthlutun styrkja að jafnræðis væri gætt milli ólíkra sjónarmiða til Evrópusambandsins, sbr. 5. gr. reglna um úthlutun styrkja til að stuðla að umræðu og fræðslu um Evrópusambandið.

Við úthlutun styrkja var litið til gæða umsókna og þeirra verkefna sem sótt var um styrk til. Fjöldi umsókna um styrki til verkefna var umtalsvert meiri en unnt var að verða við og margar góðar styrkbeiðnir bárust.“

Evrópuvaktin kynnti tvö verkefni í umsókn sinni:

• 1. Kynning á viðhorfum innan framkvæmdastjórnar ESB í Brussel og meðal stjórnmálamanna og embættissmanna í einstökum ESB-ríkjum á aðildarumsókn Íslands.
• 2. Rannsókn á viðhorfum meðal hagsmunaaðila á þeim þremur þáttum sem skipta mestu í viðræðum fulltrúa Íslands við Evrópusambandið, það er um landbúnaðarmál, sjávarútvegsmál og gjaldmiðilsmál.

Frá þessu er skýrt hér því að ýmsir keppinautar Evrópuvaktarinnar í netheimum, þar á meðal Egill Helgason á Eyjunni og nafnlaus höfundur Kaffistofunnar á Pressunni hafa leitast við að gera umsókn Evrópuvaktarinnar eða ákvörðun úthlutunanefndar tortryggilega. Á Pressunni segir meðal annars 2. september:

„Hvað halda lesendur að andstæðingar aðildar Íslands að Evrópusambandinu myndu segja ef fjölmiðill myndi þiggja fé frá sambandinu til að auka umfjöllun um það og kynna ESB fyrir Íslendingum?

Nokkur orð sem myndu pottþétt skjóta upp kollinum: Leigupennar, landráð, keyptur áróður, landsölumenn, inngrip í íslensk innanríkismál.

Og svo framvegis.

Þess vegna skal þeim félögum Birni Bjarnasyni, fyrrverandi ráðherra, og Styrmi Gunnarssyni, fyrrverandi ritstjóra, sem saman gefa út vefsíðuna Evrópuvaktina, óskað alveg sérstaklega til hamingju með að hafa í dag fengið úthlutað mörgum milljónum króna til að standa að fræðslu og umræðu um sambandið hér á landi.

Ekki aðeins höfðu þeir félagar smekk fyrir því að sækja um, heldur munu þeir alveg örugglega þiggja þennan styrk með þökkum.

Hræsni?“

Aðstandendum Evrópuvaktarinnar er heiður að þiggja þennan styrk frá alþingi. Þeim er ekki kunnugt um að alþingi hafi sótt um fé til Evrópusambandsins til að mynda þann 27 milljón króna sjóð sem það ákvað að nýta til að efla umræður um málefni Evrópusambandsins hér á landi. Viðbrögð þeirra Egils Helgasonar á Eyjunni og Kaffistofunnar á Pressunni, sami eigandi er að báðum netmiðlunum, eru dæmigerð fyrir vanþroskaðar umræðurnar um ESB.

Rétt er að minna á að Evrópusambandið hefur ákveðið að verja 230 milljónum króna til að kynna málstað sinn hér á landi næstu tvö árin, það er varið verður að meðaltali 9 milljónum króna á mánuði í þetta kynningar- og áróðursstarf. Þessari upplýsingaherferð er stjórnað frá Berlín en hér á landi kemur almannatengslafyrirtækið Athygli að henni. Þegar af stað var farið sagði forstjóri þess að ekki væri um áróður að ræða, hann væri stundaður af sendiráði Evrópusambandsins á Íslandi. Þau ummæli eru álíka klaufaleg og misheppnuð árás á Evrópuvaktina fyrir að þiggja fé frá Evrópusambandinu þegar um styrk frá alþingi er að ræða sem heimild er fyrir á fjárlögum íslenska ríkisins.

Bj. Bj.