Samfylking í leit að nýjum formanni-vinsæl sjónvarpskona til umræðu?

Þótt ekki fari hátt er ljóst að formannsslagur er framundan í Samfylkingunni. Árni Páll Árnason varð á einni nóttu alvöru formannsefni, eftir að Jóhanna rak hann úr ríkisstjórn. Eftirmál gengislánadóms Hæstaréttar hafa hins vegar veikt stöðu hans.Sumir telja hana vonlausa af þeim sökum en það er sjálfsagt of mikið sagt. Veikari staða Árna Páls er hins vegar líkleg til að styrkja stöðu Dags B. Eggertssonar, borgarfulltrúa, en þó verður að teljast ólíklegt að hann nái sér verulega á strik. Hópurinn í kringum Jóhönnu mun reyna að halda Guðbjarti Hannessyni fram en það verður erfitt.

Eru aðrir frambjóðendur á ferð? Innan Samfylkingar hafa heyrzt raddir um að eftirsóknarvert gæti verið að leita eftir frambærilegri konu utan þingflokks og þrengstu flokksraða. Í þeim vangaveltum hafa sumir staðnæmst við nafn vinsællar sjónvarpskonu, Þóru Arnórsdóttur.

Framganga hennar í sjónvarpi sýnir að þar er á ferð ung kona, sem setur sig vel inn í mál, sem hún fjallar um og setur spurningar fram við viðmælendur sína með skýrum og skiljanlegum hætti.

Ekki skaðar að hún á sér djúpar rætur í sögu jafnaðarmannahreyfingarinnar á Íslandi- sonardóttir Hannibals Valdemarssonar.

Það væri þá ekki í fyrsta sinn, sem stjórnmálaflokkur leitaði liðsstyrks í raðir sjónvarpsmanna.

SG