Enn standast ekki boðaðar tímaáætlanir gagnvart ESB - sendiherra Íslands í Brussel gerður afturreka

Augljóst er að engar tímaáætlanir sem íslenskir stjórnmálamenn hlynntir ESB-aðild nefna standast. Baldur Þórhallsson, prófessor og frambjóðandi Samfylkingarinnar, sagði fyrir kosningar 2009 að yrði sótt um aðild að ESB þá um sumarið yrði unnt að greiða þjóðaratkvæði um niðurstöðuna um mitt ár 2010. Árni Páll Árnason, frambjóðandi Samfylkingarinnar, taldi að vísu að þetta mundi dragast fram í mars 2011.

Össur Skarphéðinsson og Stefan Füle

Íslenskir embættismenn sem vinna að því í umboði Samfylkingarinnar að koma Íslandi í ESB hafa einnig gefið yfirlýsingar um tímasetningar. Hinn 25. febrúar 2012, eftir að Danir höfðu tekið við formennsku í ráðherraráði ESB, birtist þessi frétt hér á Evrópuvaktinni:

„Ísland er ekki á hraðleið inn í ESB heldur á sanngjarnri leið“, segir Þórir Ibsen, sendiherra Íslands gagnvart ESB, í samtali við Georgi Gotev, ritstjóra vefsíðunnar EurActiv, sem birtist á síðunni föstudaginn 24. febrúar. Þórir segist vænta þess að allir samningskaflar í viðræðum fulltrúa ESB og Íslands verði opnaðir fyrir lok júní.„

Hér vísar sendiherrann til þess sem hann telur sanngjarna leið Íslands inn í ESB, að allir samningskaflarnir 33 verði opnaðir fyrir lok júní 2012. Štefan Füle, stækkunarstjóri ESB, var hér á dögunum. Hann taldi líklegt að opna mætti þrjá kafla á ríkjaráðstefnu hinn 22. júní til viðbótar þeim 15 sem þegar hafa verið opnaðir, það er að alls verði 18 kaflar opnaðir af 33 þegar Danir skila af sér formennsku innan ESB í lok júní 2012.

Hið einkennilega er að utanríkisráðherra og embættismenn hans láta eins og ekkert sé eðlilegra en ekkert af því standist sem þeir láta sér um munn fara og snertir opnun og lokun samningskafla. Ef það er ekki einu sinni unnt að treysta mati hinna sérfróðu fulltrúa Íslands á þessu má þá teysta öðru sem þeir segja um samskiptin við ESB? Til dæmis væntanlegar sérlausnir?

Bj. Bj.