Eru sveitar­stjórnar­menn utan vinnutíma í ESB-ferðum? Hvers vegna þetta pukur? Nöfnin á að birta

„Leynd hvílir yfir lista með nöfnum þeirra sveitarstjórnarmanna sem þáðu boð Evrópusambandsins um ferð til Brussel fyrr í mánuðinum;“ segir á dv.is mánudaginn 25. júní.

Þessi táknræna mynd sýnir Berlyamont, aðsetur framkvæmdastjórnar ESB í Brussel, sökkva vegna evru-vandans.

Um er að ræða kjörna fulltrúa í sveitarstjórnum landsins sem fóru til Brussel í því skyni að kynnast ESB „og hvaða áhrif aðildarviðræðurnar og hugsanleg aðild að sambandinu hefði á sveitarstjórnarstigið hér á landi“ segir dv.is. Þar kemur einnig fram að sendiráð ESB hér á landi neiti að leggja fram lista yfir nöfn þeirra sveitarstjórnarmanna sem fóru í Brussel-ferðina. „Hér á landi ríkir trúnaður um gögn á borð við nafnalistann og er því ekki hægt að afhenda hann, þar sem um persónulegar upplýsingar er að ræða. Slíkar upplýsingar séu aldrei afhentar þriðja aðila,“ segir þar.

Samband íslenskra sveitafélaga kynnti félagsmönnum sínum þessa ferð sem var farin 18. til 20. júní. Framkvæmdastjóri sambandsins segir hins vegar við dv.is að hann og starfsmenn hans hafi ekki haft neina „aðkomu að skipulagi ferðarinnar“.

Í auglýsingu um ferðina er boðin gisting á fjögurra stjörnu hóteli. Dagpeningar í evrum voru afhentir „í umslagi, eins og venjan er hjá Evrópusambandinu þegar dagpeningar eru greiddir út til aðila sem ekki starfa sjálfir fyrir sambandið,“ segir DV og að önnur sambærileg ferð sé á dagskrá í haust en ekki sé vitað hverjum þá verði boðið.

Almennt ráða menn því boð hverja þeir þiggja. Þegar um kjörna fulltrúa er að ræða ber hins vegar að gæta ákveðinna regla. Nokkur hvellur varð yfir því á dögunum þegar borgarfulltrúi í Reykjavík þáði boðsferð í fyrstu ferð flugfélags. Þá komust siðvæðingarflokkarnir, Besti flokkurinn og Samfylkingin, að þeirri niðurstöðu að borgarfulltrúinn hefði ekki verið í vinnunni.

Þótt ESB-sendiráðið telji íslensk lög hindra að það skýri frá nöfnum gesta sinna (sendiráðið telur Vínarsamninginn ekki hindra áróðurstarfsemi sendiherra ESB hér á landi) gildir annað um Samband ísl. sveitarfélaga, sveitarstjórnir og sveitarstjórnarmennina sjálfa. Einfaldasta leiðin fyrir Samband ísl. sveitarfélaga væri að tilkynna félagsmönnum sínum að nöfn þátttakenda í ESB-ferðum verði birt þá gæti ESB-sendiráðið afhent DV eða öðrum nafnalistann.

Séu sveitarstjórnarmenn utan vinnutíma þegar þeir þiggja boð í skemmtiflug til útlanda gildir það ekki þegar þeir ferðast í hinum alvarlega tilgangi að kynna sér áhrif hugsanlegrar ESB-aðildar á sveitarstjórnarstigið. Til ferðarinnar er stofnað til að móta skoðanir þeirra, ESB er að afla sér stuðningsmanna að fyrirmælum stækkunardeildar sambandsins.

Geri allar siðareglurnar sem samþykktar hafa verið undanfarið ekki ráð fyrir því að kjörnir fulltrúar upplýsi umbjóðendur sína um þátttöku í innrætingarferðum ESB er stærri glufa í þeim en ætla hefði mátt að óreyndu.

Bj. Bj.