ESB-aðildarsinni maldar í móinn - segir að halda beri viðræðunum áfram

ESB-aðildarsinnar á Íslandi eru í mikilli vörn um þessar mundir. Skýrast birtist þetta í ágreiningi innan VG og ríkisstjórnarinnar. Jóhanna Sigurðardóttir forsætisráðherra segir að þetta séu „panik viðbrögð“ ráðherra í hennar eigin ríkisstjórn. „Panikeri“ ráðherrar er meginástæðan að þeir treysta ekki forsætisráðherranum.

Sema Erla

Á hættustundu sýna menn mismunandi mikið hugrekki. Jóhanna segir að samráðherrar hennar frá VG skorti hugprýði, hræðslan hafi náð tökum á þeim. Sema Erla er stjórnmálafræðingur sem útskrifaðist með meistaragráðu í Evrópufræðum (e. European Union Politics and Law) frá Edinborgarháskóla árið 2011. Hún starfar nú sem verkefnastjóri hjá Já Ísland. Henni rennur blóðið til skyldunnar og tekur til varna fyrir ESB-aðildarviðræðurnar á bloggsíðu sinni mánudaginn 13. ágúst.

Sema Erla týnir fram sjö rök: (1) ESB-samstarfið má rekja til tveggja heimsstyrjalda. (2) Evrópusambandið var stofnað til þess að takast á við krísur og á því leikur enginn vafi að Evrópusambandið og Evrópa muni jafna sig á þessum erfiðleikum. (3) Framtíð Evrópu hefur alltaf verið óljós, framtíð Íslands er óljós, enda veit enginn hvað framtíðin ber í skauti sér. (4) Erfiðleikarnir í Evrópu hafa ekki stoppað Króata í því að vilja ganga í Evrópusambandið. (5) Svartfjallaland, sem hóf viðræður við ESB í lok júní á þessu ári. (6) Eistar tóku upp evru þann 1. janúar á síðasta ári. (7 ) Önnur ríki bíða þess að taka upp evruna.

Rök Semu Erlu eru ákaflega veik og lágu öll fyrir þegar Íslendingar ákváðu að velja frekar aðild að evrópska efnahagssvæðinu en að ganga í ESB. Þau segja hins vegar ekki neitt um hvers vegna nauðsynlegt er fyrir Íslendinga að halda áfram viðræðum um aðild að ESB. Króatar, Svartfellingar og Eistlendingar eru í allt annarri stöðu en Íslendingar. Það er í besta falli einfeldningslegt að leggja hagsmuni þjóða að jöfnu á þann hátt sem Sema Erla gerir.

Umræður innan ESB og sérstaklega innan evru-svæðsins snúast nú um það sem hér er nefnt sem (2) röksemd Semu Erlu – evru-krísan afsanni einmitt kenninguna um að krísur séu tæki í þágu aukins ESB-samruna, evru-krísan valdi einmitt hinu gagnstæða, hún sundri þjóðum. Mario Monti, forsætisráðherra Ítalíu, hefur varað við hættuna af þessu og mælt með auknum samruna en hvatningarorð hans í þá veru falla í grýtta jörð. Röksemd (3) á jafnt við Ísland utan eða innan ESB, hún afhjúpar best hve léttvægar röksemdirnar eru allar.

Með vísan til raka sinna spyr Sema Erla: „Svo af hverju á þetta að hafa einhver sérstök áhrif á okkur? Af hverju segja menn umsóknina um aðild að Evrópusambandinu búna að vera?“

Svarið við spurningunum er einfalt: Rökin sýna að Íslendingar eiga ekkert sérstakt erindi í ESB. Heimsstyrjaldirnar eru söguleg staðreynd. Vígbúnaður er nú af því tagi að engum heilvita manni dettur í hug að beita honum í Evrópu. Að Íslendingar eigi að tengjast ESB vegna þess að krísur leiði til meira yfirþjóðlegs valds innan ESB er öfugmæli. Framtíð Íslendinga er óráðin utan og innan ESB. Allt sem varðar þjóðir og gæslu þeirra á eigin hagsmunum snýst um þær en ekki Íslendinga. Niðurstaða: Hætta ber ESB-viðræðunum strax.

Bj. Bj.