Frábær grein Bjarna Harðarsonar-eru „þjóðlegir vinstri menn“ að koma fram á sjónarsviðið?

Frábær grein Bjarna Harðarsonar, fyrrum alþingismanns, í Morgunblaðinu í gær, laugardag, er vísbending um að í burðarliðnum geti verið nýtt framboð „þjóðlegra vinstri manna“. Bjarni segir:

Þessi mynd fylgdi greininni í Aftenposten um EFTA-dóminn í Icesave-málinu.

„Með verkum sínum hefur ríkisstjórnin hleypt inn í landið nútímainnrásarher möppudýra. Vinstrihreyfingin-grænt framboð, sem áður var ankeri baráttunnar gegn ESB er í þessu máli orðið að umskiptingi. Einu stjórnmálaflokkarnir, sem hafa ESB-andstöðu að baráttumáli eru vel hægra megin við miðju. Þrátt fyrir að framboð til komandi kosninga séu mörg er ljóst að það eru fáir valkostir þjóðlegra vinstrimanna, sem hafna ásælni og heimvaldastefnu, hvort sem hún kemur frá NATÓ eða ESB.

Vinur minn, Indriði Aðalsteinsson á Skjaldfönn í Djúpi skrifaði nýlega grein á Smuguna og í Morgunblaðið sem var herhvöt til Jóns Bjarnasonar og allra þeirra, sem áður tilheyrðu villikattadeild VG. Jóhanna Sigurðardóttir, nafngjafi villikattadeildar, kvartaði mjög undan því að erfitt væri að smala köttum og vel þekkt er að skepna sú fer sínar eigin leiðir. Vel má samt vera að Djúpbóndanum takist með hvatningu sinni að kveðja saman söfnuð þjóðlegra vinstrimanna og er þá vel.“

Grein Bjarna í heild er þess eðlis, að hana ættu sem flestir að lesa en sú hugsun, sem hún byggir á, þ.e. að vinstri sinnaðir kjósendur, sem eru andvígir aðild að ESB eigi að loknum landsfundi VG í raun engan valkost er rétt.

Það hefur skapast pólitískt tómarúm á vinstri vængnum, sem opnar tækifæri fyrir „þjóðlega vinstri menn“ til að láta að sér kveða.

SG