Karl Th. við Árna Pál: Láttu ekki orð standa!

Karl Th. Birgisson var um tíma framkvæmdastjóri Samfylkingarinnar. Hann óttast nú um framtíð flokksins í pistli á vefsíðunni Eyjunni. Hann segist reiður Árna Páli Árnasyni, nýkjörnum formanni Samfylkingarinnar, fyrir „þráhyggjukennda hreinskilni“ hans. Hún hafi birst í orðum hans um að ekki tækist að ljúka „heildarendurskoðun stjórnarskrárinnar“ fyrir kosningar.

Karl Th. Birgisson

„Hvaðan kom manninum þörf til að skríða upp úr skotgröfunum og æða út í kúlnahríðina sem vitað var að hæfist samstundis?“ spyr Karl Th. og einnig: „Þarf maður að vera prestssonur til að vera haldinn svona alvarlegri píslarvættissjálfseyðingarhvöt?“

Þá segir Karl Th.:

„Ef ég ætti ráð handa Árna Páli væri það að gleyma þessu um að sannleikurinn sé sagna beztur. Það er nothæft á milli kosninga, en hreint gereyðingarvopn á kosningavori.

Formaðurinn ætti að fara í plötusafnið sitt og finna lagið góða, „Lærðu að ljúga“ með Nýjum dönskum.

Þar eru fínar leiðbeiningar og ekki flóknar. Okkur myndi öllum líða svo miklu betur á eftir.

Eins og dæmin sanna.“

Það lýsir ástandinu innan Samfylkingarinnar að besta leiðin fyrir formanninn skuli talin að hann segi ekki satt og rétt frá málum. Það standi honum helst fyrir þrifum að segja ekki ósatt.

Á hvaða leið er stjórnmálaflokkur þar sem áhrifamenn um taktík og kosningaspuna mæla opinberlega með að flokksformaðurinn ljúgi að eigin flokksmönnum og kjósendum?

Eitt er víst að það er ekki stjórnmálaflokkur þar sem orð skulu standa.

Bj. Bj.