Prófkjör Sjálfstæðis­flokks: Úrslitin koma ekki á óvart - en þau eru óvenjuleg

Það væri ofmælt að segja, að úrslitin í prófkjöri Sjálfstæðisflokksins í Reykjavík komi á óvart vegna þess að það voru engar skýrar vísbendingar um hvernig staðan væri í hópi þeirra fjögurra, sem sóttust eftir fyrsta sæti listans. Hins vegar eru úrslitin óvenjuleg. Þetta er í fyrsta sinn, sem forystumaður í sveitarstjórnarmálum Sjálfstæðisflokks á landsbyggðinni nær slíkum árangri í aðdraganda borgarstjórnarkosninga í Reykjavík, sem Halldór Halldórsson hefur nú náð.

Kjartan Magnússon, borgarfulltrúi, telur í samtali við mbl.is, netútgáfu Morgunblaðsins að úrslitin séu ekki dómur yfir borgarfulltrúum flokksins. Það er erfitt að sjá hvernig Kjartan kemst að þeirri niðurstöðu. Úrslitin eru áfall fyrir borgarstjórnarflokkinn í heild og ákveðinn dómur um störf hans á því kjörtímabili, sem er að líða.

Sá dómur kemur hins vegar ekki á óvart. Staðreynd er að lítið hefur heyrzt til borgarstjórnarflokksins á þessu kjörtímabili. Stundum er eins og hann hafi ekki verið til.

Hvað ætli hafi valdið því?

Að öðru leyti er þetta prófkjör áhyggjuefni fyrir Sjálfstæðisflokkinn. Það var lítill spenningur í kringum það, nánast engar umræður utan flokksins og engar sérstakar umræður eða átök um einstök málefni.

Halldór Halldórsson á ekki að láta sem ekkert sé og að Sjálfstæðisflokkurinn standi ekki frammi fyrir alvarlegum vandamálum nú í aðdraganda kosningabaráttu. Hann á þvert á móti að tala opið um vandamál Sjálfstæðisflokksins í borgarstjórn.

Sjálfstæðisflokkurinn á á brattann að sækja.

SG