Birgitta og smjörklípan til bjargar Assange

Birgitta Jónsdóttir og sjóræningjar hennar skjóta sér undan umræðum um ólögmætar hleranir á símum alþingismanna. Hvernig halda menn að þetta fólk hefði látið ef aðrir ættu hlut að máli? Þá hefði ekki skort ásakanir og fyrirspurnir út og suður. Birgitta hefði búið sig undir að fara með málið í Alþjóðaþingmannasambandið eða hún hefði tekið það upp á vettvangi NATO-þingsins.

Julian Assange

Þegar Birgitta var í Hreyfingunni fannst tölva í herbergi flokksins þar sem þingmenn hafa skrifstofur. Er hún ekki vísbending um að þá hafi einhverjir í Hreyfingunni verið í tengslum við WikiLeaks? Julian Aassange sem var í nánu sambandi við Birgittu (hún sá meðal annars um að koma honum í jólaboð í bandaríska sendiráðinu í Reykjavík) segist hafa undir höndum upptökur sem benda til njósna um alþingismenn.

Þegar Birgitta var spurð um ummælin sem höfð voru eftir Assange um hleranir á þingmannasímum svaraði hún á þá leið að hún hefði hvorki séð þessar hleranir né heyrt þær. Af hverju var hún ekki spurð hvort hún hefði vitað af þeim? Markmið Birgittu er þöggun. Hún vill drepa allar umræður um málið. Furðulegt er að aðrir þingmenn skuli líða henni það. Hér er um pólitískt hneykslismál að ræða sem ber að útkljá á stjórnmálavettvangi.

Ríkisútvarpið hafði eftir heimildarmanni tengdum WikiLeaks að þetta hefði nú bara verið rugl í Assange. WikiLeaks-menn sem vilja að öll mál séu rakin til enda vilja ýta þessu máli til hliðar sem rugli þótt það sýnist reist á bandarískum réttarskjölum. Hver skyldi þessi heimildamaður fréttastofu ríkisútvarpsins vera? Blaðafulltrúinn Kristinn Hrafnsson, talsmaður WikiLeaks og Julians Assange? Er Kristinn öruggasti heimildarmaður í þessu máli? Hvað ætli hann segði ef farið væri að óskum blaðafulltrúa NSA, Þjóðaröryggisstofnunar Bandaríkjanna, um allar fréttir af uppljóstrunum Edwards Snowdens?

Til að draga athygli frá umræðum um hleranir á þingmannasímum og yfirlýsingum Julians Assange um þær hefur verið gripið til smjörklípuaðferðarinnar: Kristinn Hrafnsson og félagar taka til við að ræða hvað Birgitta Jónsdóttir hafi fengið mikið greitt frá Dreamworks í Hollywood fyrir að leggja efni í handritið á kvikmyndinni The Fifth Estate um Assange, Birgittu og fleiri. Myndin lendir líklega á lista yfir leiðinlegustu myndir ársins 2013. Þar birtist Assange sem frekar ógeðfelldur náungi eins og honum er lýst í bókunum að baki myndinni.

Að sumu leyti minnir þessi þöggunarleikur þeirra sem vilja að allt sé opið og ekkert fari leynt á ódýra sápuóperu. Hvers vegna á að gera að engu yfirlýsingu Assange um hleranir á símum alþingismanna? Sé hún rugl hvað þá um allt hitt sem frá manninum kemur?

Bj. Bj.