Reykjavík - nýtt málgagn vinstri-grænna

Vinstri-græn hafa reynt fyrir sér í útgáfumálum með frekar döprum árangri. Þau héldu um nokkurt skeið úti vefsíðunni Smugunni sem lagði upp laupana með þeim orðum að hún yrði opnuð aftur fengist einhver til að kosta hana. Hún er enn lokuð og hefur verið í marga mánuði.

Fyrir skömmu var greint frá gögnum frá starfsmannasamtökum ríkisútvarpsins þar sem sagði meðal annars:

„Undanfarin ár hefur ríkt pukur í stjórnkerfinu varðandi málefni RÚV og lítið sem ekkert samráð haft við starfsfólk. Dæmi um slíkt var í kringum smíði frumvarpsins um RÚV á síðasta kjörtímabili þegar “skuggahópur„ fyrri ríkisstjórnar stýrði öllum helstu málum á bak við tjöldin.“

Ingimar Karl Helgason sem starfaði hjá Smugunni. Hann sagði á vefsíðu sinni 24. janúar 2013:

„Stundum er talað um skuggastjórnendur. Enda þótt hugtakið finnist ekki í lagasafni, þá er það til í almennu máli. Það þýðir að sá sem stýrir hefur ekki formlega stöðu, en þegar hann skipar er honum hlýtt.“

Nú hafa vinstri-grænir ekki aðstöðu til að láta „skuggahóp“ sinn stjórna ríkisútvarpinu í skjóli Katrínar Jakobsdóttur. Þeir hafa hins vegar komið ár sinni fyrir borð hjá Ámunda Ámundasyni sem er útgefandi og ábyrgðarmaður vikublaðsins Reykjavík sem dreift er ókeypis til höfuðborgarbúa.

Ingimar Karl Helgason hefur tekið að sér ritstjórn Reykjavíkur og þar er engin skuggastjórn. Ritstjórinn gengur hreint til verks og birtir efni á borð við það sem mátti lesa á Smugunni og leiddi til þess að enginn vildi leggja útgáfu hennar fjárhagslegt lið. Það er með nokkrum ólíkindum að menn kjósi frekar að festa fé í sömu efnistökum með kaupum á auglýsingum í vikublaðinu Reykjavík.

Bj. Bj.