Er Björt Framtíð „frjálslyndur hægri flokkur“?

Árni Páll Árnason

Það mátti skilja Árna Pál Árnason, formann Samfylkingar á þann veg á Sprengisandi Sigurjóns M. Egilssonar fyrir skömmu að hann teldi Bjarta framtíð „frjálslyndan hægri flokk“ og að grundvallarmunur væri á þeim flokki og Samfylkingu, sem væri „sósíaldemókratískur“ flokkur, aðili að Alþjóðasambandi jafnaðarmanna.

Þetta er forvitnileg skilgreining.

Jafnaðarmannaflokkar 20. aldarinnar lögðu áherzlu á pólitíska baráttu í þágu „verkalýðsins“. Það samheiti yfir almenna launþega er kannski orðið álitaefni. Verkafólk fyrri tíma er í raun orðið að stjórnendum véla og tækja, sem vinna þá vinnu sem áður var unnin með höndunum, hvort sem er til sjós eða lands.

Eru jafnaðarmenn 21. aldarinnar helztu málsvarar þeirra sem minnst mega sín? Sjálfsagt eru þeir það að einhverju leyti en þó er það svo að í Evrópu eru jafnaðarmenn að missa tengslin við almennt launafólk, sem hefur flykkst til fylgis við þá flokka, sem jafnaðarmenn sjálfir kalla hægri öfgaflokka.

Hvernig má það vera?

En jafnframt eru jafnaðarmenn sjálfir að verða helztu málsvarar hinnar „nýju stéttar“, þ.e. pólitískrar yfirstéttar stjórnmálamanna og embættismanna, sem hafa fyrir löngu misst tengslin við hinn almenna borgara.

Sé skilgreining Árna Páls á Bjartri Framtíð sem „frjálslyndum hægri flokki“ rétt verður fróðlegt að fylgjast með viðureign þess flokks og hins nýja hægri flokks, sem rætt var um að stofna á fundi í gær.

Og jafnframt verður spennandi að fylgjast með þeim átakalínum sem væntanlega verða til innan meirihluta borgarstjórnar Reykjavíkur á milli „jafnaðarmanna“ Samfylkingar og hinna „frjálslyndu hægri manna“ Bjartrar Framtíðar!

SG