Enginn stækkunar­stjóri lengur hjá ESB

Við nánari athugun á verkaskiptingu innan nýrrar framkvæmdastjórnar ESB kemur í ljós að þar er ekki neinn stækkunarstjóri með sama hlutverk og Stefan Füle hefur í fráfarandi framkvæmdastjórn.

Embætti stækkunarstjóra er aflagt og í stað þess er talað um stækkunarviðræðstjóra. Orðinu „negotiations“ – viðræður – hefur verið bætt við fyrra embættisheitið.

Skýringin á þessu er einföld. Jean-Claude Juncker, forseti framkvæmdastjórnarinnar, segir að Evrópusambandið stækki ekki þau fimm ár sem hann situr sem forseti.

Nú ræða fulltrúar ESB við fulltrúa Serbíu, Svartfjallalands og Tyrklands um aðild og einnig er litið á Makedóníu og Albaníu sem umsóknarlönd segir í fréttum um þessa áherslubreytingu innan framkvæmdastjórnarinnar. Ekki er minnst einu orði á Ísland enda hefur viðræðum verið slitið.

Þeir sem skrifa fréttir um þessi mál í tilefni af skiptum á framkvæmdastjórum telja Ísland ekki heldur til umsóknarríkja. Þrátt fyrir að það liggi í augum uppi að Ísland er alls ekki við hlið Albaníu né Makedóníu sem umsóknarríki hefur ríkisstjórn Íslands ekki dug í sér til að afturkalla umsóknina.

Óskiljanlegt er að Gunnar Bragi Sveinsson utanríkisráðherra hafi ekki frumkvæði að afturköllun gagnvart hinni nýju framkvæmdastjórn ESB.

Utanríkisráðherra hlýtur að taka á sig rögg fyrir 1. nóvember 2014 þegar hinn nýja framkvæmdastjórn sest að völdum og binda enda á þetta ófremdarástand í samskiptunum við ESB – hér er ekki annað en um heimatilbúinn vanda að ræða.

Bj. Bj.