Vill enga lög­reglumenn með byssur eða vélbyssur á götur víkingabæjarins - bæjarráð Hafnarfjarðar ætlar að ræða málið

Fréttastofa ríkisútvarpsins heldur áfram að kanna viðhorf áhrifamanna til vopnanna sem landhelgisgæslan á í lokuðum öryggisgámi á lokuðu öryggissvæði á Keflavíkurflugvelli. Sunnudaginn 26. október sneri hún sér til Haraldar Líndals Haraldssonar, bæjarstjóra í Hafnarfirði, sem segir á ruv.is:

„Ég set margar spurningar við það að lögreglan sé að koma sér upp svona vopnabúri og ég get ekki séð eins og t.d. í Hafnarfirði að það sé ástæða fyrir lögregluna að vera með slík vopn í bílum hjá sér. [Dregið hafi úr glæpatíðni á höfuðborgarsvæðinu.] Þannig að mér finnst þetta alveg þvert á það. Byssur og vélbyssur er ekki það sem maður vill sjá á götum Hafnarfjarðarbæjar.

Og mér finnst vera kominn svolítill vandræðagangur í kringum þetta mál allt hjá stjórnvöldum. Svörin sem hafa komið eru misvísandi. Og mér finnst það heldur ekki réttlætanlegt að menn taki við vélbyssum bara af því að það er verið að gefa þær. Það verða að vera mjög ríkar ástæður fyrir því að taka við slíkum gjöfum. Og mér finnst að ef á að taka við svona vopnum þá á ekki að skipta máli hvort það er gjöf eða keypt, það hljóta að vera aðrar ástæður fyrir að menn taka við svona löguðu.“

Ekki kemur fram hvaða spurningar fréttamaður ríkisútvarpsins lagði fyrir bæjarstjórann en svör hans eru óneitanlega nokkuð á skjön við það sem fram hefur komið í byssumálinu svonefnda undanfarna daga, líti menn á staðreyndir þess.

Lögreglan er ekki að koma sér upp neinu vopnabúri heldur er rætt um endurnýjun á vopnum sem hún hefur þegar undir höndum. Ekkert af þessum byssum frá Noregi er komið í hendur lögreglunnar. Samkomulagið við Norðmenn um þetta mál er í samræmi við hefð í samskiptum íslenskra yfirvalda við samstarfsaðila á Norðurlöndunum. Að sjálfsögðu liggur mat um nauðsyn endurnýjunar á þessum tækjakosti að baki ákvörðunum um vopnin.

Svör eru misvísandi milli fulltrúa norska hersins annars vegar og landhelgisgæslunnar hins vegar. Forstjóri landhelgisgæslunnar vonar að það spilli ekki góðu og mikilvægu samstarfi við Norðmenn.

Hafnarfjörður kynnir sig sem víkingabæ eins og sjá má á skiltum þegar ekið er um Reykjanesbraut í átt til höfuðborgarsvæðisins. Í bænum er víkingaveitingastaður og víkingahótel. Á alþjóðlegri víkingahátíð leiða saman hesta sína bardagamenn og bogaskyttur. Bæjarstjórinn þarf örugglega ekki að óttast að af tilefnislausu muni lögreglumenn með byssur eða vélbyssur skyggja á þá sem berjast með atgeirum, sverðum og bogum í hjarta Hafnarfjarðar.

Í fréttinni á ruv.is segir að bæjarráð Hafnarfjarðar ætli að ræða „málið“ á fundi mánudaginn 17. október. Stóra spurningin er hvaða „mál“ bæjarráðið ætlar að ræða: Skoðun bæjarstjórans eða staðreyndir varðandi byssurnar á öryggissvæðinu á Keflavíkurflugvelli?

Bj. Bj.