Íslensku ESB-flokkarnir í krísu eins og Evrópu­sambandið sjálft - Jón Baldvin sér ekki aðild í spilunum

Skoðanakönnun sem birt var mánudag 2. mars sýnir að Píratar sækja á meðal stjórnarandstöðuflokkanna og eru nú stærri en Björt framtíð og VG. Á ruv.is segir að samkvæmt þjóðarpúlsi Gallup ætli 15,2% landsmanna nú að kjósa Pírata, þrefalt fleiri en kusu flokkinn í apríl 2013. Píratar bæti við sig hátt í fjórum prósentustigum á milli mánaða og aðeins Sjálfstæðisflokkurinn með 26 % og Samfylkingin með 17% njóti meiri stuðnings. Þá mælist fylgi Bjartrar framtíðar rúm 13%, VG rúm 11% og Framóknarflokkurinn 11%.

ruv.is

Könnun Capacent Gallup á fylgi flokkanna

Af þessum tölum sést að fyrrverandi stjórnaflokkar sem stóðu að umsókninni um aðild að ESB, Samfylking og VG, rétt slefa að vera stærri samtals en Sjálfstæðisflokkurinn sem þó hefur mátt sjá sinn fífil fegri og hefur engu öðru að fagna en að skipa efsta sæti í könnun sem endurspeglar pólitíska upplausn, ekki verða Píratar sagðir standa fyrir festu og stöðugleika.

Við þessa kreppu ESB-flokkanna bætast síðan efasemdarraddir um ágæti ESB-aðildar frá gamalgrónum talsmönnum aðildarinnar. Þar hefur Jón Baldvin Hannibalsson, fyrrv. utanríkisráðherra og síðar sendiherra, farið fremstur í flokki í rétt 20 ár eða frá árinu 1995 þegar hann boðaði þá stefnu sem formaður Alþýðuflokksins að sækja ætti um aðild að ESB en hafði ekki erindi sem erfiði, Alþýðuflokkurinn varð að engu og Samfylkingin, arftaki hennar, komst ekki í ríkisstjórn fyrr en árið 2007 og tók þá að vinna að ESB-aðild. Sumarið 2009 rættist draumur flokksforystunnar með ESB-umsókninni en hann hefur breyst í martröð eins og fram kom í samtali Björns Inga Hrafnssonar á Eyjunni við Jón Baldvin Hannibalsson sunnudaginn 1. mars

Jón Baldvin svaraði spurningunni: „Eiga Íslendingar að fara þarna inn [í ESB]?“ á þennan veg:

„Nei, nei, við erum ekkert á þeirri leið, og taktu eftir því sem ég segi við erum ekkert á leiðinni inn í Evrópusambandið á næstunni.“

„Um það er að segja; ætl¬um við að virða lýðræðis¬leg¬ar niður¬stöður kosn¬inga ef ein¬hverj¬um í Brus¬sel eða í for¬ystu Evr¬ópu¬sam¬bands¬ins í Þýskalandi mis¬lík¬ar það?“

Hann sagði síðan:

„Evrópusambandið er í fjármálalegri krísu sem er bæði bankakrísa og skuldakrísa. Evrópusambandið er í hagstjórnarkrísu, þú nefndir Þýskaland, vegna þess að pólitíkin sem Þýskaland hefur þröngvað upp á Evrópu sem er niðurskurður á félagslegri þjónustu og hækkun skatta í jaðarríkjunum hefur ekki skilað neinum árangri. Hún hefur haft þveröfug áhrif sem allir áttu að hafa lært af reynslu heimskreppunnar á sínum tíma.“

Þá taldi Jón Baldvin stjórnmálakreppu ríkja innan ESB, hagsmunir fjármagnsins kæmu í veg fyrir lýðræðislegar breytingar eftir kosningar. „Í slíku ástandi skapast jarðvegur fyrir fasisma og rasisma, við erum líka að upplifa það.“

Jón Baldvin sagði „vandræði á vinstri vængnum“ hér á landi og stjórnarandstaðan sinnti ekki heimavinnunni. Hún næði engum árangri nema hún sannfærði þjóðina um að hún hefði aðra framtíðarsýn, aðrar lausnir sem væru raunverulegar og trúverðugar.

Nýja könnunin á fylgi flokkanna er gerð á sama tíma og talsmenn Samfylkingar og Bjartrar framtíðar hafa í heitingum við stjórnarflokkana vegna boðaðar tillögu um að afturkalla ESB-umsóknina – þegar meira að segja Jón Baldvin telur umsóknina tímaskekkju er fokið í öll skjól fyrir talsmenn hennar.

Bj. Bj.