Le Figaro segir aldrei hafa verið rætt um sjávar­útvegsmál milli ESB og Íslands - lesendur fagna ákvörðun ríkis­stjórnar­innar

Í erlendum fjölmiðlum er fjallað um ákvörðun ríkisstjórnar Íslands um að retiré sa candidature à l'Union européenne eins og það er orðað í Le Figaro, það er draga til baka umsókn að Evrópusambandinu. Mið-hægri ríkisstjórnin hafi lofað að binda enda á ferlið sem hófst árið 2009.

Gunnar Bragi Sveinsson utanríkisráðherra hafi tilkynnt formanni ráðherraráðs ESB þetta og framkvæmdastjórn ESB auk þess hafi hann skrifað á netsíðu sína: „Hagsmunum Íslands er betur borgið utan Evrópusambandsins.“

Þá segir í Le Figaro:

„Vinstristjórn lagið umsóknina inn á tíma þegar alvarleg fjármálakrísa hafði veikt tiltrú fólks til stofnana sinna og vakið löngun til að tengjast evru-svæðinu enda blasti við gengisfall krónunnar.

Einni spurningu er þó alltaf ósvarað: hvernig á að brúa bilið milli ráðamanna í Brussel og Reykjavík varðandi aflaheimildir, meginstoð íslensks efnahags. Um þetta viðkvæma mál var aldrei fjallað í viðræðunum frá júní 2011 til janúar 2013.“

Í frétt Le Figaro sem er reist á frétt frá AFP-fréttastofunni er áréttuð sú staðreynd sem blasir við öllum sem rýnt hafa í viðræður fulltrúa Íslands og ESB að aldrei var rætt um sjávarútvegsmál af því að ESB neitaði að ræða þau á grundvelli álits meirihluta utanríkismálanefndar – umsóknarríkisstjórn Jóhönnu Sigurðardóttur heyktist á að breyta álitinu og því neyddist Össur Skarphéðinsson umsóknarráðherra til að setja viðræðurnar á ís í janúar 2013.

Þegar þetta er skrifað hefur 201 lesandi Le Figaro látið í sér heyra á vefsíðu blaðsins um þessa frétt blaðsins og er tóninn almennt mjög jákvæður í garð Íslands og Íslendinga vegna ákvörðunar ríkisstjórnarinnar.

Hér skal birt lausleg þýðing á þremur athugasemdum.

CarlosSolis segir:

„Í fjármálakreppunni sýndi Ísland að það var eina landið í Evrópu sem brást við af skynsemi í því skyni að gæta hagsmuna eigin borgara.

Hafnað var aðhaldsstefnu þar sem borgararnir eru látnir greiða fyrir bankana, dregnir voru fyrir rétt þeir sem báru ábyrgð í stjórnmálum og fjármálum, miskunnarlaus barátta gegn spillingu o. s. frv.

Niðurstaða: Ísland er eina ríkið sem er komið úr kreppunni. Og með prýði.

Landið sannar það enn einu sinni í dag.

Bravó og virðing.“

Mouf11 segir:

„Bravó Ísland! ESB er þegar dautt en stjórnendur þess vita það ekki ennþá.“

bitum57 segir:

„hér er þjóð sem hefur kynnt sér málið rækilega og lætur þjóðarhagsmuni ráða en ekki einkahagsmuni. bravó.

þessu er alls ekki svona farið hjá okkur.“

Bj. Bj.