Rússland: Fallhlífarhermenn og landgönguliðar sendir á strönd Norður-Íshafsins - breytt stjórnkerfi í mótun á norðurslóðum

Rússneskir fallhlífarhermenn

Rússneskir fallhlífarhermenn frá Ivanovo-hersveit flughersins stukku í fyrsta sinn til jarðar á Novaja Zemlja og Franz Josef landi í Norður-Íshafi miðvikudaginn 18. mars segir í frétt rússneska varnarmálaráðuneytisins. Var þetta liður í allsherjaræfingu rússneska Norðurflotans sem hófst fyrirvaralaust mánudaginn 16. mars.

Tilgangur æfingarinnar með fallhlífarhermönnunum var að tryggja varnir hernaðarlega mikilvægra staða og búa í haginn fyrir landgöngu meginheraflans. Fleiri en 10 Iljushin II-76 vélar fluttu hermennina og búnað þeirra.

Alls taka 38.000 hermenn, rúmlega 55 herskip og kafbátar, 110 hervélar og þyrlur þátt í æfingunni. Með henni á að leggja mat á getu Norðurflotans til að tryggja hernaðarlegt öryggi Rússlands á Norður-Íshafi.

Í mars 2014 stukku 350 hermenn frá Ivanovo-sveitinni til jarðar á Kotelníj-eyju í Nýju-Síberíu klasanum. Árið 2014 stukku 90 fallhlífarhermenn frá Iljúshí II-76 niður að fljótandi rannsóknarstöðinni Barneo á ísnum skammt frá Norðurpólnum.

Rússneskir hermenn

Landgönguliðar í Norðurflotanum æfa landgöngu á strönd Norður-Íshafsins. Hermenn hafa gengið um borð í landgönguskipið Kondopoga að sögn RIA Novosti-fréttastofunnar. Í fréttinni segir að skipið flytji liðið að stað sem herráðsforingjar sem fylgjast með æfingunum ákveða.

Við æfinguna verða notaðir BTR-80 og MTLB-V brynvarðir landgöngudrekar og farartæki. Rússneskir fjölmiðlar hafa ekki upplýst um landgöngustaðinn. Fyrsta landgönguæfing Rússa á heimskótaslóðum var árið 2012 þegar gengið var á land á Nýju Síberíueyjum. Svipuð æfing var endurtekin árið 2013.

Hluti af þessari skyndiæfingu er að flytja flugvélar til varavalla. Næstu daga verða flugvélar sendar til nýrra flugvalla í 400 til 4.000 km fjarlægð frá þeim stað þar sem vélarnar voru við upphaf æfingarinnar. Um er að ræða orrustuþotur og þyrlur.

Kafbátaleitarvélar Norðurflotans æfa kafbátavarnir á Barentshafi. Leitað er að kafbátum á svæðinu þar sem Norðurflotinn mun æfa. Þá munu Rússar einnig nota dróna til eftirlits úr lofti á Barentshafi.

Á sama tíma og æfingar Norðurflotans standa var tilkynnt þriðjudaginn 17. mars að ný rússnesk alríkisnefnd um norðurslóðir hefði verið skipuð undir formennsku Dmitrís Rogozinz varaforsætisráðherra sem lýst er sem harðlínumanni. Nefndin á að samhæfa störf ríkisstofnana sem sinna byggðaþróun.

Rússneska blaðið Kommersant segir að nefndin muni fjalla um félagsmál, efnahagsmál, stjórnmál og hermál. Á fyrsta fundi nefndarinnar hafi verið ákveðið að „endurmeta allt sem Rússar eiga á norðurslóðum.

Rogozin er á bannlista Bandaríkjanna, ESB og annarra ríkja vegna beinna afskipta hans af innri málum Úkraínumanna.

Heimild: TASS og BarentsObserver

Bj. Bj.