Frakkland: Tillaga um að lögfest verði lágmarksþyngd sýningarstúlkna

Fyrir franska þinginu liggur nú tillaga sem miðar að því að banna of grönnum konum að koma fram sem tískusýningarstúlkur. Gerð verði krafa um lágmarksþyngd fyrirsæta. Stuðningsmenn tillögunnar, stjórnarflokkur sósíalista, segja að samþykkt hennar yrði markvert skref í baráttunni við átröskun (anorexiu).

Gert ráð fyrir að refsa megi umboðsskrifstofum og tískuhúsum sem virða ekki ákvæði um kröfur til líkamsþyngdar og mælingar með allt að um 80.000 evru sekt og sex mánaða fangelsi. Lokaákvörðun um þessar kröfur yrði í höndum franskra heilbrigðisyfirvalda.

Í Ísrael hafa þegar verið samþykkt lög sem banna þátttöku of léttra og of ungra fyrirsæta og sýningarstúlkna. Á Ítalíu og Spáni er til skoðunar að flytja frumvarp með svipuðum ákvæðum og finna má í franska frumvarpinu. Í þessum löndum treysta yfirvöld enn á að innan tískuheimsins gæti menn grundvallaratriða að þessu leyti án opinberra afskipta. Árið 2008 var svipuð tillaga og nú til umræðu í Frakklandi en frá því var fallið að afgreiða hana vegna mótmæla tískuhönnuða og framleiðenda.

Ákvæði um lágmarksþyngdina er hluti af frumvarpi að heildarlögum um heilbrigðismál sem er til umræðu í neðri deild franska þingsins. Olivier Véran, taugasérfræðingur og þingmaður, er flutningsmaður tillögunnar. Hann segir að verði hún samþykkt verði stigið skref til að auðvelda baráttuna gegn átröskun sem hann telur herja á 30.000 til 40.000 manns í Frakklandi.

Undanfarin ár hefur dauði sýningarstúlkna vegna vannæringar vakið heitar umræður um heilsufar og útlit þeirra sem taka þátt í tískusýningum. Þótt menn innan greinarinnar leggist gegn lagasetningu hafa margir áhrifamenn þar sagt að þeir kjósi að nýta sér krafta „heilbrigðra módela“ og stuðla að heilbrigðum lifnaðarháttum.

Heimild: NYT

Bj. Bj.