Merkel og Tsipras leggja sig fram um að lægja öldur og treysta framtíðar­samstarf

Af fjölmiðlum í Þýskalandi og Frakklandi má ráða að fundur Angelu Merkel Þýskalandskanslara og Alexis Tsipras, forsætisráðherra Grikklands, í Berlín mánudaginn 23. mars hafi verið á vinsamlegum nótum. Merkel hamraði enn á því sama og áður að Grikkir yrðu að leggja fram trúverðugar tillögur um leið út úr fjárhagsvanda sínum en Tsipras sagði að Merkel væri manneskja sem „hlustaði“ á fólk.

Angela Merkel og Alexis Tsipras í kanslarahöllinni í Berlín mánudaginn 23. mars 2015.

Þau lögðu sig fram um að gera gott úr því sem þeim bar á milli þar á meðal kröfum Grikkja um stríðsskaðabætur á hendur Þjóðverjum vegna síðari heimsstyrjaldarinnar. Tsipras gerði að gamni sínu og sagðist hafa komið með góða veðrið til Berlínar: „Við verðum að skilja hvort annað. Eina leiðin felst í samræðum,“ sagði gríski forsætisráðherrann en orðahnippingar hafa einkennt samskipti þýskra og grískra stjórnvalda frá því að Tsipras settist að völdum fyrir tveimur mánuðum.

Merkel lagði áherslu á „nána vináttu“ þjóðanna tveggja. Margir Þjóðverjar nytu þess mjög að eyða frídögum sínum í Grikklandi og hinir mörgu Grikkir sem byggju í Þýskalandi hefðu smíðað „lifandi brú“ milli „.þjóða okkar“.

Kanslarinn sagði að allir lánardrottnar Grikkja ekki aðeins Þjóðverjar yrðu að ákveða hvort stjórnin í Aþenu hefði gripið til nógu róttækra aðgerða til að eiga rétt á að fá 7,2 milljarða evru útgreiðslu af neyðarláni sem þeim hefur verið veitt. Sagt er að gríski ríkissjóðurinn komist í greiðsluþrot miðvikudaginn 8. apríl fái hann ekki þetta fé.

Um tíma var talið að gríska ríkisstjórnin ætlaði að ganga að eignum þýska ríkisins í Grikklandi, eins og húsi Goethe Institut. Tsipras aftók að það yrði gert. Þá er bent á að hann hafi notað mun mildari orð um stríðsskaðabæturnar í Berlín en hann gerði í gríska þinginu á dögunum.

Nú sagði hann: „Við verðum að varpa birtu á skugga fortíðarinnar. Þetta er ekki aðeins spurning um efnislega þætti heldur er um siðferðilegt vandamál að ræða.“

Angela Merkel sagði að öllu uppgjöri vegna stríðsskaðabóta væri lokið „á stjórnmálalegum og lögfræðilegum vettvangi“. Þjóðverjar gerðu sér grein fyrir þeim „grimmdarverkum“ sem þeir hefðu unnið og „óréttlætið og þjáningarnar“ væru ef til vill ekki „eins hugstæðar mörgum Þjóðverjum“ og þær mættu vera.

Utanríkismálaritstjóri Frankfurter Allgemeine Zeitung segir að fyrir fundinn í Berlín hafi verið talað eins og menn gerðu á tíma kalda stríðsins um væntanlega toppfundi milli Bandaríkjamanna og Sovétmanna þar sem jafnvel örlög alls heimsins kynnu að vera í húfi. Hann segir að nú sé tímabært að milda orðræðuna og horfast í augu við raunveruleikann, málum sé nefnilega þannig háttað að um „sameiginlega framtíð“ þjóðanna sé að ræða.

Hvetur ritstjórinn til þess að menn hætti að stunda „trúðapólitík“ og vonar að Tsipras átti sig betur á því eftir heimsóknina til Berlínar hver séu markmið Evrópustefnu þýsku ríkisstjórnarinnar, þar ráði hvorki drottnunarþörf né fyrirmælaþrá. Vilji Grikkir nota evru áfram og njóta virðingar sem samstarfsaðili verði þeir að haga sér í samræmi við það. Undan því verði ekki vikist. Það sé spor í rétta átt að Tsipras segist ætla að virða gerða samninga. Hitt sé ekki síður mikilvægt að hætta að tala um þjóðir á þann veg að skella á þær einhverjum stimplum.

Bj. Bj.