Slegið á putta Birgittu - ekkert kosningabandalag á döfinni

Birgitta Jónsdóttir, kafteinn Pírata, fór fram úr sér fyrir helgi þegar hún boðaði kosningabandalag stjórnarandstöðuflokkanna.

Laugardaginn 21. mars sagði Þóra Kristín Ásgeirsdóttir fréttamaður á Stöð 2 á vefsíðunni visir.is:

Birgitta Jónsdóttir

„Birgitta Jónsdóttir, kapteinn Pírata, vill að stjórnarandstöðuflokkanir myndi kosningabandalag fyrir næstu þingkosningar sem hafi það að markmiði að klára vinnu við nýja stjórnarskrá og leysa upp þingið til að koma henni í gegn ef það nái kjöri. Þá verði lofað að greiða þjóðaratkvæði um aðildarviðræður við ESB.

Hún ætlar að leggja þetta formlega til við forystumenn annarra stjórnarandstöðuflokka í upphafi næstu viku ef hún fær grænt ljós hjá félögum sínum í Pírötunum.“

Helgi Hrafn Gunnarsson, þingmaður Pírata, ómerkti þessi áform Birgittu þriðjudaginn 24. mars. Þá segir á ruv.is:

„Helgi Hrafn Gunnarsson, þingmaður Pírata, segir að hugmyndin gangi ekki út á sameiginlegt framboð stjórnarandstöðuflokkanna fyrir þingkosningar. Hún geri heldur ekki ráð fyrir að núverandi stjórnarandstöðuflokkar myndu bindast bandalagi um að mynda ríkisstjórn út heilt fjögurra ára kjörtímabil. “Nei, ekki svona í hefðbundnum skilningi, heldur upp á það fyrst og fremst að kjósendur viti fyrirfram að hverju þeir ganga að grundvallarmálum eins og stjórnarskránni og lýðræðisumbótum. Þannig að næsta kjörtímabil, sem væntanlega yrði mjög stutt ef þessi hugmynd gengi eftir, snerist um það að gera þær grundvallarbreytingar sem þarf að gera á íslenska stjórnmálakerfinu.„

Þetta er ekki í fyrsta sinn sem Birgitta Jónsdóttir fer fram úr sér og samstarfsmönnum með yfirlýsingagleði sinni. Hið sérkennilega er hve forystumenn stjórnarandstöðunnar voru fljótir til að hlaupa á vagninn hjá henni. Skýringin er þó einföld: Þeir vilja eyðileggja flokk Pírata vegna velgengni hans í skoðanakönnunum.

Helgi Hrafn minnist ekki á ESB þegar hann nefnir hjartans mál Pírata.

Bj. Bj.