Þögn aðildarsinna

Eftir því er tekið að talsmenn aðildar Íslands að Evrópusambandinu hafa hægt um sig um þessar mundir. Það heyrist ekkert í þeim. Hvorki í helztu talsmönnum Samfylkingarinnar né stuðningsmönnum þeirra í öðrum flokkum. Félagasamtök, sem hafa barizt fyrir aðild að Evrópusambandinu láta lítið fara fyrir sér. Það er jafnvel hljótt um Samtök iðnaðarins á þessu sviði, sem ekki hefur gerzt í áratugi. Kannski eru ekki allir félagsmenn í samtökunum sáttir við þann áróður, sem samtökin hafa haldið uppi fyrir aðild?

Gylfi Arnbjörnsson, forseti ASÍ sagði ekki orð um aðild Íslands að ESB á 1. maí, hátíðisdegi verkalýðsins. Og verkalýðshreyfingin almennt segir fátt. Kannski eru forystumenn verkalýðsfélaganna byrjaðir að átta sig á því að 112 þúsund félagsmenn þeirra skilja ekki hvaða hagsmunir eru fólgnir í því fyrir þá að ganga í ESB. Þeir fylgjast bara með fréttum um vaxandi atvinnuleysi í evrulöndunum.

Þessi þögn aðildarsinna segir þó ekki alla söguna. Í utanríkisráðuneytinu er unnið hörðum höndum að því að koma Íslandi inn í Evrópusambandið. Þó eru engar samningaviðræður hafnar og í raun verða engar samningaviðræður, þótt öðru sé haldið fram í því ráðuneyti. Greiningarskýrsla framkvæmdastjórnar Evrópusambandsins um Ísland er ekki lögð fram til þess að leggja grundvöll að viðræðum af hálfu ESB. Greiningarskýrslan er tilkynning til Íslendinga um það, hvað þeir þurfi að gera til þess að geta fengið inngöngu í Evrópusambandið.

Vinnan, sem nú stendur yfir í utanríkisráðuneytinu og öðrum ráðuneytum snýst ekki um að undirbúa samningaviðræður. Hún snýst um að ganga frá því hvernig Íslendingar verði við kröfum ESB. Ísland verður að... er algeng byrjun á setningum í greiningarskýrslunni.

Það er mikilvægt að andstæðingar aðildar Íslands að Evrópusambandinu átti sig á því, að þetta er logn á undan storminum. Að því kemur að það færist mikill þungi í þessar umræður hér á Íslandi. Þess vegna skiptir það undirbúningsstarf, sem nú er unnið að á vegum Heimssýnar, þverpólitískra samtaka, sem vinna gegn aðild Íslands að ESB svo mikilvægt og grasrótarstarfið, sem unnið er á vegum samtakanna í einstökum byggðarlögum og á höfuðborgarsvæðinu.

Andstæðingar aðildar verða að efla samtök sín, herða róðurinn og gefa ekkert eftir.