Vill meirihluti þingmanna halda áfram á ESB-óheillabrautinni?

Innan Samfylkingarinnar binda ESB-aðildarsinnar vonir við að breyting á ríkisstjórninni 31. desember 2011 verði til þess að auðvelda ESB-aðildarviðræðunar. Margrét S. Björnsdóttir, formaður framkvæmdastjórnar Samfylkingarinnar, sagði í Fréttablaðinu 2. janúar 2012: „Ráðherraskiptin eru líklega einnig forsenda þess að takist að ljúka með eðlilegum hætti samningum um aðild Íslands að ESB … “

Óljóst er hvað felst í orðunum „eðlilegum hætti“. Er leikaraskapurinn og hægferðin í viðræðunum við ESB Jóni Bjarnasyni að kenna? Leikaraskapur af því að til þessa hefur svonefnd samninganefnd Íslands opnað og lokað viðræðuköflum sem skipta í raun engu þegar til þess er litið að Ísland er aðili að evrópska efnahagssvæðinu og hefur því lagað sig að kröfum ESB á mörgum efnissviðum.

Stóð Árni Páll Árnason sem vék úr ríkisstjórninni 31. desember 2011 í vegi fyrir því að ESB-viðræðunum lyki með „eðlilegum hætti“? Árni Páll lagði sitt af mörkum fyrir kosningar 2009 þegar Samfylkingin fullyrti að á skjótan hátt mætti leiða Ísland inn í ESB. Viku fyrir þingkosningarnar 25. apríl 2009 kynnti Árni Páll eftirfarandi ESB-aðildarferli á vefsíðu Samfylkingarinnar (17. apríl 2009):

• Umsókn í maí 2009.

• Viðræður við ESB hefjast í byrjun júní 2009.

• Samningar takast á innan við 12 mánuðum.

• Samningur liggur fyrir snemma sumars 2010.

• Alþingi leggur til við ríkisstjórn að samningurinn verði fullgiltur, að fengnu samþykki þjóðarinnar í þjóðaratkvæðagreiðslu.

• Umræða um þingsályktunartillöguna á alþingi haustið 2010.

• Efni samningsins kynnt almenningi á fundum á vegum ríkisstjórnar og hagsmunaaðila.

• Þjóðaratkvæðagreiðsla snemma árs 2011.

• Aðildarsamningur samþykktur.

• Apríl 2011 frumvarp til laga um breytingu á stjórnskipunarlögum lagt fyrir alþingi.

• Sumar 2011 þingrof eftir staðfestingu stjórnarskrárbreytingar.

• Haust 2011 þingkosningar .

Varla dettur nokkrum í hug að Árna Páli hafi verið vikið úr ríkisstjórn fyrir að svíkja þetta þaulhugsaða kosningaloforð Samfylkingarinnar?

Í ársbyrjun 2012 sér ekki fyrir endann á ESB-viðræðunum. Samfylkingin lætur þó eins og ekkert hafi í skorist í heiminum frá árinu 2009. ESB er í upplausn, evran hangir á bláþræði og brottför Jóns Bjarnasonar úr ríkisstjórn Íslands tryggir að unnt verði að ljúka ESB-viðræðunum með „eðlilegum hætti“.

Það er fyrir löngu tímabært að samskipti Íslands og ESB verði færð á annan og skynsamlegri grundvöll en gert hefur verið undir stjórn Jóhönnu Sigurðardóttur, Steingríms J. Sigfússonar og Össurar Skarphéðinssonar. Alþingi getur gert það með einfaldri ályktun. Vill meirihluti þingmanna í raun að haldið sé áfram á þessari óheillabraut út í óvissuna?

Vill