Evruríkin leika sér að eldi-þjóð­félags­átök í uppsiglingu?

Fréttir frá Grikklandi í alþjóðlegum fjölmiðlum snúast að mestu um samskipti grískra stjórnvalda og lánardrottna þeirra og umræður í öðrum löndum um vandamál Grikkja. Minna er um fréttir af því hvernig ástandið i Grikklandi snertir hinn almenna borgara þar í landi, þótt viðbrögð þess fólks komist í fjölmiðla ef efnt er til mótmælafunda eða annarra aðgerða.

Hins vegar er auðvitað ljóst að þær harkalegu aðhaldsaðgerðir, sem gripið hefur verið til í Grikklandi hafa nú þegar haft afdrifaríkar afleiðingar á lífskjör fólks í landinu. Og þó eru þær aðhaldsaðgerðir enn sem komið er meira í orði en á borði. En það hlýtur að vera mikið umhugsunarefni, hvort niðurstaðan af þeim tilraunum, sem staðið hafa yfir í bráðum tvö ár til þess að ná tökum á vandamálum Grikkja sé ekki sú, að það sé betri kostur að ná fram nauðsynlegum kjaraskerðingum með gengislækkunum en á þann veg, sem nú er reynt að gera i Grikklandi. Alla vega sýnist ljóst, að íslenzka þjóðin er að komast betur frá sínum vandamálum en Grikkir.

Nú herma fréttir frá Evrópu, að Portúgal kunni að verða næst á dagskrá. Portúgal hefur nú þegar fengið neyðarlán frá ESB/AGS en nýjar athuganir þýzkrar rannsóknarstofnunar benda til að það muni ekki duga til. Portúgalar geti ekki staðið undir skuldum sínum að óbreyttu pg frekari aðgerða sé þörf. Þær aðgerðir þýða enn frekari aðhaldsaðgerðir í efnahagsmálum í Portúgal. Hvað er langt þangað til svipað ástand skapast í Portúgal og nú er í Grikklandi?

Þjóðfélagslegar afleiðingar þessara aðgerðra allra eru mikið áhyggjuefni. Í þau fáu skipti, sem fjallað er um líf almennings í Grikklandi í aljþóðlegum fjölmiðlum kemur fram að ástandið er hörmulegt. Fólk á ekki fyrir mat, börn komi matarlaus í skólann o.sv. frv. Þennan boga er ekki hægt að spenna endalaust. Hann brestur.

Afleiðingarnar geta orðið þjóðfélagslegar óeirðir og átök. Í báðum þessum ríkjum er löng saga einræðis og yfirráða hers viðkomandi landa. Það er ekki hægt að útiloka, að ef reynt er um of þanþol almennings í þessum löndum verði slík umskipti á nýjan leik.

Evruríkin eru að leika sér að eldi.