Hinir íslenzku bandamenn fjármálaveldanna í Evrópu

Gerry Adams, leiðtogi Sinn Féin, hins róttæka baráttuflokks fyrir sjálfstæði Írlands alls segir að Írar séu ekki byrjaðir að reisa götuvígi gegn ríkisfjármálasamningnum, sem greidd verða atkvæði um þar í landi í lok maí en hann heldur því fram að hægfara bylting sé í gangi. Kannski má nota þau orð um það, sem er að gerast í Evrópu, að þar sé eins konar bylting í gangi gegn þeirri efnahagsstefnu, sem Þjóðverjar hafa undanfarin misseri reynt að þvinga fram gagnvart öðrum evrurikjum. Í sumum tilvikum er sú bylting hægfara en í öðrum er hún kannski hraðskreiðari eins og í Grikklandi og Frakklandi.

Kjarni málsins er þó sá að í mörgum evruríkjanna er þemað það sama. Fólkið í þessum löndum sættir sig ekki við þessa stefnu, hvort sem ráðamönnum í Berlín og Brussel þykir það ljúft eða leitt. Fólkið í þessum löndum hefur nú þegar risið upp og sent fyrrverandi ráðamenn, sem gengið höfðu að kröfum Þjóðverja til síns heima. Það á við í Portúgal, Spáni, Ítalíu, Grikklandi, Írlandi, nú Frakklandi og þessi hreyfing er jafnvel farin að teygja anga sína til Hollands sbr. stöðu Gert Wilders og til Finnlands sbr. stöðu Sannra Finna.

Nú gengur hinn pólitíski armur Írska lýðveldishersins fram fyrir skjöldu og segir við Íra. Með því að hafna ríkisfjármálasamningi ESB eruð þið að hjálpa fólki í öllum þessum löndum til þess að standast kúgunaraðgerðir, sem hafa beinzt að okkur öllum.

Því verður ekki neitað að Írar voru kúgaðir til að taka á sig skuldir írsku bankanna. Ef þeir hefðu ekki gert það væru Írar ekki í þeim vandræðum, sem þeir eru nú. Og því verður ekki neitað að aðgerðirnar gagnvart Grikklandi höfðu það endanlega takmark að bjarga evrópskum bönkum, sem höfðu lánað of mikið til Grikklands.

Alþingi mundi leggja sitt lóð á þessa vogarskál með því að stöðva aðildarumsóknina að ESB. En það gerist ekki á meðan vinstri flokkarnir á Íslandi leggja svo mikla áherzlu á að standa við bakið á fjármálaöflunum í Evrópu!

Hver hefði getað ímyndað sér að þau Jóhanna Sigurðardóttir, Steingrímur J. Sigfússon og Gylfi Arnbjörnsson yrðu helztu bandamenn Deutsche Bank og annarra fjármálavelda í Evrópu??