Evrukreppan hefur neikvæð áhrif á efnahagslega endurreisn Íslands

Samdráttarskeið í íslenzkum efnahagsmálum eru ekki alltaf til komin af okkar eigin völdum. Jafnvel þótt hinir einkavæddu íslenzku bankar hefðu ekki hrunið haustið 2008 hefðum við sem samfélag orðið fyrir miklum neikvæðum áhrifum af fjármálakreppunni, sem byrjaði að sjást í sumarið 2007 og jókst svo jafnt og þétt.

Samdráttarskeiðin hjá okkur hafa stundum orðið til vegna aflabrests eða verðfalls á íslenzkum afurðum í öðrum löndum en stundum vegna almennra neikvæðra áhrifa fyrir okkur af vanda annarra þjóða.

Nú er t.d. augljóst að evrukreppan er farin að hafa mikil áhrif um allan heim. Nú eru að koma fram tölur, sem sýna að efnahagslægðin í Bretlandi er dýpri og meiri en búizt var við og engin spurning um að evrukreppan á þar mikinn hlut að máli. Hið sama er að segja um Kína. Nú er ljóst að evrukreppan hefur það mikil áhrif í Kína, að kínversk stjórnvöld verða að bregðast við með einhverjum hætti.

Við hér á Íslandi eigum eftir að upplifa það að evrukreppan tefur efnahagslega endurreisn Íslands af þeirri einföldu ástæðu, að hagkerfi okkar er alltaf viðkvæmt fyrir neikvæðri þróun hjá helztu viðskiptaþjóðum okkar.

Við eigum hins vegar við óvenjulegan vanda að stríða að þessu leyti, sem aðrar þjóðir þurfa ekki að kljást við. Á vettvangi stjórnmálanna á Íslandi má helzt ekki tala um evrukreppuna, hvað þá að ræða þau áhrif, sem hún kunni að hafa á endurreisn okkar efnahags, alveg burtséð frá aðildarumsókninni.

Evrukreppan er eins konar „tabú“ í stjórnarherbúðum. Hana og afleiðingar hennar má ekki ræða af ótta við að slikar umræður hafi neikvæð áhrif á afstöðu þjóðarinnar til aðildar að ESB.

Ef nokkuð er „veruleikafirring“ er þetta slík firring.