Það skortir forystu í Evrópu og það er hættulegt

Aðvörun Marios Montis, forsætisráðherra Ítalíu um helgina þess efnis, að sundrung sé að grafa um sig meðal aðildarríkja Evrópusambandsins þarf engum að koma á óvart. Hið eina sem kemur á óvart er að enginn af leiðtogum þessara ríkja hafi talað á þennan hátt fyrr.

Monti segir í viðtali við Spiegel um helgina að spennan í samskiptum aðildarríkjanna sé að verða svo mikil að það sé hætta á eins konar sálrænni sundrungu á milli þeirra. Hann bendir á að andúð á Þýzkalandi fari vaxandi á Ítalíu, sem kannski birtist með skýrustum hætti á forsíðu ítalsks dagblaðs, sem birti mynd af Angelu Merkel og stóra fyrirsögn fyrir ofan myndina svohljóðandi: Fjórða ríkið.

Tilvísun til Þriðja ríkis Adolfs Hitlers er augljós. Monti viðurkennir að það sé að verða til lína milli norðurs og suðurs á meginlandi Evrópu og að um gagnkvæma fordóma sé að ræða hjá þjóðum sitt hvorum megin línunnar í garð hverrar annarrar.

Það hefur alltaf legið ljóst fyrir, að evrukreppan gæti leitt til þjóðfélagslegra átaka enda hefur hún gert það að hluta til í í löndunum við Miðjarðarhaf. En hættan á að reiði fólks sneri ekki bara að stjórnvöldum heima fyrir heldur líka að þeim sem betur mega sín innan ESB og þá fyrst og fremst Þjóðverjum hefur alltaf verið fyrir hendi.

Það er sama hvort birtar eru myndir af Merkel með hakakross eða fyrirsagnir um fjórða ríkið. Öllum er ljóst hvað við er átt.

Þegar efnahagsvandamál þjóða fara í þennan farveg er ljóst að hætta er á ferðum en jafnframt að það skortir pólitíska forystu.

Slík forysta er ekki fyrir hendi í Evrópu nú.

Söguleg reynsla sýnir að þá er mikil hætta á ferðum.