Verður staðan í Evrópu til umræðu á Alþingi á miðvikudagskvöld?

Jóhanna Sigurðardóttir, forsætisráðherra, flytur stefnuræðu sína á Alþingi á miðvikudagskvöld og í kjölfarið fara fram umræður um hana. Það verður forvitnilegt að sjá, hvort forsætisráðherra ræðir að nokkru marki það síversnandi ástand, sem nú er innan Evrópusambandsins og hvort hún telji að það skipti nokkru máli í sambandi við aðildarumsókn Íslands. Það verður líka fróðlegt að sjá hvort talsmenn annarra flokka í þessum umræðum gera stöðu mála í Evrópu að nokkru verulegu umræðuefni.

Það er stórfurðulegt að fylgjast með því hvernig Alþingi kemur sér hjá því árum saman að ræða stærstu mál þjóðarinnar. Það á ekki við um Evrópusambandið eitt. Þótt rétt sé sem Ögmundur Jónasson, innanríkisráðherra, hefur sagt að Evrópa logar og hefur gert um skeið hefur Alþingi ekki mátt sjá af nokkrum tíma síðustu rúm tvö ár til að ræða þá stöðu í þaula.

Þetta minnir á að þótt augljós merki væru um það sumarið 2007, að fjármálalegt óveður væri í aðsigi og reyndar viðvörunarmerki um það frá því í lok nóvember 2005 fóru engar raunverulegar umræður fram á Alþingi um það, hvort Íslandi væri einhver hætta búin af þeim sökum.

Komi það í ljós í stefnuumræðunum á miðvikudagskvöld, að þingmenn leiði stöðu mála í Evrópu enn einu sinni hjá sér, er það fyrst og fremst til marks um að þeir þingmenn sem nú sitja á þingi eru óhæfir til að gegna störfum þar. Getur verið að þeir fylgist ekki með?

Því fer fjarri að yfirlýsing Seðlabanka Evrópu um kaup á skuldabréfum Spánar og Ítalíu hafi einhverju breytt. Í ljós er komið að þeim kaupum fylgja svo harðir skilmálar og raunverulegt afsal fjárráða af hálfu þessara tveggja ríkja, að óvíst er hvort þau nýti sér þennan möguleika.

Í Þýzkalandi er svo mikil reiði yfir væntanlegum aðgerðum SE, að álitamál er hvort þær koma nokkurn tímann til framkvæmda þegar af þeim ástæðum, þar sem Þjóðverjar geta beitt neitunarvaldi á mörgum stigum málsins.

Aumingjaskapur Alþingis í þessu máli er fyrir löngu kominn á það stig að það er ekki hægt að reiðast. Það er bara hægt að harma að þannig sé komið fyrir þessari sögufrægu stofnun.