„Gamla kerfið hefur verið tregt til að breyta“

Í fréttum Evrópuvaktarinnar fyrir nokkrum dögum var frá því skýrt, að sennilega þyrftu Grikkir að fá meiri peninga frá samstarfsaðilum sínum á evrusvæðinu. Þeir tæpir 142 milljarðar evra, sem þeir eru ýmist búnir að fá eða eiga eftir að fá muni ekki duga til.

Hvað veldur?

Ein skýring er sú sem fram kemur í umfjöllun þýzka tímaritsins Der Spiegel um þetta mál en hún hljóðar svona:

„Gamla kerfið hefur verið tregt til að breyta og milljarðar í neyðaraðstoð hafa ekki dugað til að koma breytingum á.“

Þetta er kjarni málsins í Grikklandi, á Ítalíu, Spáni og Portúgal. Og sennilega á Írlandi, þótt með öðrum hætti sé.

Spiegel hefur eftir prófessor í hagfræði við háskóla í Aþenu að „stjórnmálakerfi okkar er eitrað“

Til marks um það er að jafnvel Antonis Samaras, forsætisráðherra, hafi látið það verða eitt sitt fyrsta verk að ráða nokkra flokksbræður úr kjördæmi sínu til starfa hjá hinu opinbera eftir að hann tók við embætti.

Það er í tízku í norðurhluta Evrópu að líta svo á, að ástandið í okkar hluta heimsins sé að þessu leyti betra en í Suður-Evrópu.

En er það svo?

Er það ekki veruleiki hér á Íslandi eins og í Grikklandi að „gamla kefið“ sé tregt til að breyta til?

Er það ekki veruleiki hér eins og í Grikklandi að flokksbræður séu ráðnir til starfa? Það er bara gert á annan veg en áður. Í stað þess að ráða þá formlega til stafa eru þeim falin svokölluð verkefni á vegum opinberra aðila.

Við eigum ekkert erindi inn í Evrópusambandið en við eigum vissulega við margvísleg sömu vandamál að etja og einstök aðildarríki Evrópusambandsins.