Er pólitísk borgarastyrjöld háð í Evrópu?

Það er umhugsunarverð skilgreining á ástandinu innan Evrópusambandsins í fréttaskýringu á vefsíðu Reuters fréttastofunnar í dag. Þar er sú skoðun sett fram, að innan ESB ríki pólitísk borgarastyrjöld, sem Bretar heyji. Markmið Camerons með þeirri pólitísku borgarastyrjöld sé annars vegar að þurrka út úr vitund ESB-ríkja hugtakið „stöðugt nánari sameining“ og hins vegar hugsunina um „evrópskan þegnrétt“.

Það er hægt að heyja styrjöld með öðrum hætti en vopnum, bæði á hinum pólitíska vettvangi en ekki síður á fjármálamörkuðum og kannski má segja að sú borgarastyrjöld, sem stendur yfir innan ESB sé háð á þeim vígstöðvum tveimur. En auðvitað er mikið til í þessari greiningu Reuters. Átökin innan Evrópusambandsins eru svo mikil að það er ekki fráleitt að líkja þeim við borgarastyrjöld.

Hins vegar er kannski fullmikil einföldun að segja að Bretar einir séu árásaraðilinn í þeirri borgarastyrjöld. Það er rétt að þeir vinna markvisst að því að tryggja ákveðna hagsmuni sína með því fyrst og fremst að ná til sín á ný ákvörðunarvaldi í einstökum málum. En það stríð bliknar í samanburði við þau átök um grundvallaratriði, sem standa á milli Norðurríkjanna og Suðurríkjanna, svo að gripið sé til samlíkingar frá borgarastyrjöldinni í Bandaríkjunum á 19. öld. Sú borgarastyrjöld er augljóslega háð með peningum.

Evrópa var vígvöllur tveggja heimsstyrjalda á 20. öldinni. Evrópa var líka helzti vígvöllur kalda stríðsins, þótt það breiddist að vísu út um allan heim. Og nú lýsir ein helzta fréttastofa í okkar heimshluta þeirri skoðun að Evrópa sé enn á ný vígvöllur en að þessu sinni pólitískrar borgarastyrjaldar. Eins og allir vita geta slíkar styrjaldir orðið illvígari en aðrar og það þarf sterka pólitíska leiðtoga til að leiða slíkar styrjaldir til lykta. Það er ekki að sjá að Evrópa eigi slíka leiðtoga í dag.

En hitt er nýtt að aðilar sem standa utan slíkra vígvalla sækist eftir því að komast inn á þá eins og hópur fólks á Íslandi gerir enn.