Á villigötum vegna ESB-blindu

Hér skal áréttuð sú skoðun að þeir sem berjast fyrir aðild Íslands að Evrópusambandinu beita ekki heiðarlegum aðferðum við að halda málstað sínum að fólki. Allt frá upphafi hafa þeir neitað að viðurkenna hið rétta eðli viðræðnanna. Þær snúast ekki um sérlausnir umsóknarríkisins heldur framkvæmd á ESB-reglum sem ekki verður breytt í þágu einstakra aðildarríkja.

Aðildarsinnar eru hættir að nefna heimild Finna til að greiða meira með norðurhjaralandbúnaði en annars konar ESB-landbúnaði til að mótmæla rökum gegn kenningunni um sérlausnir Þeir nefna ekki heldur að Möltubúar fengu rétt til að veiða 1.500 lestir af fiski á smábátum innan 25 mílna við eyjar sínar. Helst halda þeir í þá staðreynd að fyrir 40 árum, árið 1973, sömdu Danir um að sérreglur skyldu gilda um eignarrétt á sumarhúsum í Danmörku. Danir óttuðust að Þjóðverjar mundu kaupa suðurhluta Jótlands við sameiginleg landamæri ef ekki yrði sett bann við því.

Þegar aðildarumsóknin komst á dagskrá ríkisstjórnar eftir kosningar 2009 kynnti Sjálfstæðisflokkurinn þá stefnu sína að ekki yrði sótt um aðild að ESB nema þjóðin samþykkti umsóknina í atkvæðagreiðslu. Alþingi hafnaði þeirri tillögu og haldið var af stað án stuðnings þjóðarinnar auk þess sem annar stjórnarflokkanna sagðist andvígur aðild þótt hann samþykkti umsókn um hana. Síðan hafa aðildarsinnar neitað að viðurkenna hið rétta eðli viðræðnanna.

ESB-stefnan galt afhroð í þingkosningunum 27. apríl 2013 með hruni Samfylkingarinnar. Flokkurinn er ekki svipur hjá sjón og honum hefur ekki tekist að ná sér á strik að kosningum loknum. Nú reyna ESB-aðildarsinnar að grafa undan samstarfi ríkisstjórnar Framsóknarflokks og Sjálfstæðisflokks með því að rangtúlka stefnu stjórnarinnar og stefnu Sjálfstæðisflokksins.

Sjálfstæðismenn samþykktu á landsfundi sínum fyrir kosningar 2013 að hætta ESB-viðræðunum og þær hæfust ekki að nýju nema þjóðin samþykkti það í atkvæðagreiðslu. Ragnheiður Ríkharðsdóttir, formaður þingflokks sjálfstæðismanna, leyfir sér að túlka þessa samþykkt á þann veg að flokkur hennar hafi samþykkt að efna til þjóðaratkvæðagreiðslu um framhald aðildarviðræðnanna. Hún sannar með orðum sínum að ekki er til neins að reyna sættir við fólk sem haldið er ESB-blindu.

Hans Haraldsson segir á bloggi sínu þriðjudaginn 20. ágúst:

„Ríkisstjórn sem þó var að hálfu aðildarsinnuð komst ekkert áfram með inngönguferlið á síðasta kjörtímabili og sæti að völdum ríkisstjórn sem væri að fullu aðildarsinnuð og legði aðaláherslu á ferlið væri það samt veruleg áskorun að ljúka því á yfirstandandi kjörtímabili. Það er í það minnsta sjálfstæðisyfirlýsing, ef ekki stríðsyfirlýsing gangvart veruleikanum að leggja það til að ríkisstjórn sem bæði er andsnúin aðild og hefur sett sér önnur forgangsmál ljúki ferlinu á þessu kjörtímabili. Á meðan að ekki er á dagskrá að stefna á aðild af fullum krafti er allt eins hægt að bera breytingar á hornasummu þríhyrnings undir þjóðaratkvæði eins og áframhald ferlisins.“