Samantekin ráð hjá Bandaríkjunum og AGS?

Það er óneitanlega óvenjulegt að stjórnvöld í Bandaríkjunum beini spjótum sínum jafn harkalega að bandalagsþjóð vegna stefnu hennar í efnahagsmálum, eins og bandaríska fjármálaráðuneytið hefur nú gert gagnvart Þýzkalandi og sagt er frá á viðskiptavakt Evrópuvaktarinnar í dag. Þegar á eftir fylgir efnislega sama gagnrýni frá Alþjóða gjaldeyrissjóðnum er erfitt að trúa því að um tilviljun sé að ræða og líklegra að þetta séu samræmdar aðgerðir Bandaríkjanna og yfirstjórnar Alþjóða gjaldeyrissjóðsins.

Kjarninn í gagnrýni Bandaríkjanna og AGS er í raun og veru sá, að Þjóðverjar sýni einstaka eigingirni í því hvernig þeir haldi á efnahagsmálum sínum, eigingirni sem komi svo beint niður á öðrum aðildarríkjum evrunnar.

Á sama tíma dregur Daily Telegraph þá ályktun af nýrri skýrslu eins áhrifamesta banka á Ítalíu, Mediobanca að það sé ekki lengur hægt að útiloka að Ítalía hverfi af evrusvæðinu vegna þess að aðild Ítalíu að evrunni sé ein meginástæðan fyrir því að Ítalir komist ekkert áfram.

Bandaríkin og AGS ásaka Þjóðverja um að leggja gífurlega áherzlu á að tryggja mikinn afgang af viðskiptum við önnur lönd, svo mkinn að sá afgangur hafi á síðasta ári verið meiri en Kína. Þetta geri Þjóðverjar annars vegar með áherzlu á útflutning en hins vegar með því að halda aftur af aukinni eftirspurn í Þýzkalandi.

Þegar voldugir aðilar eins og Bandaríkin og AGS koma fram með þessa gagnrýni má búast við að Miðjarðarhafsríkin, Írland og fleiri lönd muni fylgja í kjölfarið og efna til sams konar gagnrýni á Þýzkaland.

Evrópusambandið má ekki við deilum af þessu tagi innan sinna vébanda. Þær grafa undan sjálfum tilverugrunni þess.