ESB-aðildarsinnar, látið Sjálfstæðis­flokkinn í friði!

Fréttablaðið birtir þriðjudaginn 22. apríl forsíðufrétt undir fyrir sögninni: Fimmtungur er líklegur til að kjósa flokk Evrópusinna. Hún hefst á þessum orðum:

„Alls 20,7 prósent telja mjög eða frekar líklget að þau myndu kjósa framboð Evrópusinnaðra hægrimanna samkvæmt skoðanakönnun Fréttablaðsins og Stöðvar 2. Flokkurinn virðist sækja meira fylgi til kjósenda Samfylkingarinnar og Bjartrar framtíðar en Sjálfstæðisflokksins.“

Könnunin var gerð 14. og 15. apríl en aðeins 6,7% þeirra sem afstöðu tóku sögðu „mjög líklegt“ að þeir mundu kjósa framboð Evrópusinnaðra hægrimanna hins vegar sögðu 52,8% „mjög ólíklegt“ að þeir mundu kjósa nýja framboðið.

Af þeim sem kusu Samfylkinguna í kosningunum fyrir ári segjast 34% geta hugsað sér að kjósa hið nýja framboð. Í þingkosningunum 2013 galt flokkurinn mesta afhroð nokkurs íslensks stjórnmálaflokks í lýðveldissögunni. Af þeim sem kusu Bjarta framtíð 2013 segjast 28,6% geta hugsað sér að kjósa nýtt ESB-framboð en aðeins 15,7% kjósenda Sjálffstæðisflokksins á árinu 2013.

Augljóst er að þeir sem mest hafa talað um hið nýja framboð höfðu skynjað fyrir páska að ESB-aðildarmálstaðurinn höfðar aðeins til lítils brots af kjósendum. Um sömu mundir og könnunin var gerð tóku þeir að kynna framboðið undir merkjum frjálsrar verslunar og vestrænnar samvinnu. Tilgangurinn var augljós: að höfða til sjálfstæðsimanna. Í sama tilgangi hefur einnig verið lögð áhersla á að hampa mönnum sem eru kunnir fyrir störf innan Sjálfstæðisflokksins eins og Þorsteini Pálssyni, fyrrverandi flokksformanni, og Sveini Andra Sveinssyni, fyrrverandi borgarfulltrúa.

Þrátt fyrir þennan áróður og þá fásinnu að kenna þetta brölt við eitthvað sem kallað er Nýi Sjálfstæðisflokkurinn átta menn sig almennt á að hér er um pólitíska aðgerð að ræða til að halda lífi í hinni sjálfdauðu ESB-aðildarumsókn. Áköfustu fylgismenn hennar eru einfaldlega að þétta raðir sínar eins og þeim er frjálst að gera. Hið óheiðarlega við þetta brölt er að því sé klínt á Sjálfstæðisflokkinn. Það á einfaldlega mun minna skylt við hann en ESB-flokkana, Samfylkingu og Bjarta framtíð.

Vonbrigði innan Sjálfstæðisflokksins og forystu hans vegna þessa máls eru að þar hafa menn í rúm fimm ár talið sér trú um að unnt yrði að ná málamiðlun í flokknum með einhvers konar sátt við ESB-aðildarsinna. Nú er fullreynt að enginn samstarfsvilji er hjá forvígismönnum þeirra sem kenna sig við sjálfstæði og ESB-aðild, trúir blekkingariðju sinni. Þeir hafna endanlega samvinnu við þá sem styðja stefnu Sjálfstæðisflokksins í ESB-málum.

Kannanir á borð við þá sem kynnt er í Fréttablaðinu 22. apríl eru fastur liður á leið þeirra sem vilja stofna til nýs framboðs. Þetta fólk verður nú að taka af skarið innan þess 6,7% kjarna sem segist „mjög líklega“ ætla að leggja nýju ESB-aðildarframboði lið. Ákvarðanir þess hljóta að ráðast af því sem þetta fólk telur gagnast málstað sínum best en ekki af því hvaða ákvarðanir þeir sem eru í Sjálfstæðisflokknum taka.