Rússar láta Finna finna fyrir sér

Það hefur ekki farið fram hjá lesendum Evrópuvaktarinnar að umræður í Finnlandi um öryggismál Finna hafa aukizt mjög í kjölfarið á deilunum um Úkraínu. Spurningar hafa vaknað um hvort Finnar eigi að gerast aðilar að Atlantshafsbandalaginu eða láta duga að auka samstarf við Svía um öryggismál.

Sambærilegar umræður hafa verið að aukast í Svíþjóð og fyrir skömmu var skrifað undir samkomulag á milli Svía og Finna um aukið samstarf í varnarmálum.

Nú berast fréttir frá Finnlandi sem benda til þess að Rússar séu að færa sig upp á skaftið gagnvart Finnum. Sl. þriðjudag rauf rússnesk herþota tvívegis lofthelgi Finnlands, fyrst kl. sex um kvöldið og svo aftur fjórum klukkustundum seinna.

Finnska varnarmálaráðuneytið hefur staðfest þessar fréttir svo og að finnskar herþotur hafi verið sendar á loft.

Kannski finnst einhverjum að fréttir af þessu tagi skipti engu máli. Það er rangt. Athæfi sem þetta er undirbúið og úthugsað og gerist ekki af tilviljun. Rússar vilja láta Finna finna fyrir sér.

Sporin hræða í Finnlandi. Í raun var Finnland á áhrifasvæði Sovétríkjanna á meðan á kalda stríðinu stóð í fjóra áratugi. Það voru engar sovézkar hersveitir í Finnlandi en þar var ekki kosinn forseti án þess að hann hefði fengið þegjandi samþykki í Kreml.

Nú er ljóst af umræðum í Finnlandi að Finnar óttast að nú eigi að endurtaka sama leikinn. Og Svíar líta bersýnilega svo á, að slík ógn snerti ekki bara Finna heldur þá sjálfa líka.

Fyrir nokkru sást til rússneskrar herþotu í námunda við Skotland.

Ef að líkum lætur má búast við að það sama gerist í námunda við Ísland á næstu misserum.