Vefmiðlar eru mikilvægt tæki í baráttu fyrir ákveðnum málefnum

Vefmiðlar eru bylting í fjölmiðlun samtímans. Sú fjölmiðlabylting þýðir í raun að einstaklingur eða einstaklingar geta sett upp fjölmiðil með litlum tilkostnaði. Samtök, sem berjast fyrir ákveðnum málstað geta auðveldlega sett upp vefmiðil. Þannig blasir við að slíkur vefmiðill gæti orðið til í baráttunni fyrir beinu lýðræði.

Dreifing efnis á vefmiðlum er athyglisverð. Einn vefmiðill tekur upp efni af öðrum, sem þýðir aukna dreifingu og Facebook stuðlar líka að aukinni dreifingu á efni slíkra miðla.

Evrópuvaktin var sett upp fyrir fjórum árum með tvenns konar markmið í huga. Í fyrsta lagi að stuðla að aukinni umfjöllun um málefni Evrópusambandsins og í öðru lagi að berjast gegn aðild Íslands að Evrópusambandinu. Þetta var gert í kjölfar þess að Alþingi samþykkti að leggja fram umsókn um aðild Íslands að Evrópusambandinu og hefja viðræður um slíka aðild.

Nú, fjórum árum síðar, hefur þessum viðræðum verið hætt. Það er mikilvægur áfangi að lokamarkinu sem er að umsóknin verði dregin til baka.

Evrópuvaktin var ekki hugsuð sem vefmiðill, sem starfa mundi um langa framtíð heldur sem tímabundinn vettvangur fyrir baráttu gegn aðild Íslands. Þegar fullur sigur hefði verið unninn yrði þessum vefmiðli lokað.

Nú er staðan sú, að viðræðum er hætt, meirihluti er á Alþingi fyrir afturköllun umsóknar en stjórnarflokkarnir hika.

Það hik veldur því að Evrópuvaktin heldur áfram göngu sinni í breyttu formi, þar sem megináherzla er lögð á fréttaskýringar um þetta afmarkaða viðfangsefni, Ísland og Evrópusambandið.

Það er hægt að breyta vefmiðli á einum degi.

Það er hægt að hægja á ferðinni og það er hægt að herða róðurinn.

Baráttan gegn aðild Íslands að Evrópusambandinu er barátta fyrir sjálfstæði Íslands.

Þess vegna er baráttan gegn aðild Íslands að Evrópusambandinu stærsta mál okkar samtíma.