Bretland: 86% þeirra sem kusu Ukip líklegir til að gera það aftur að ári

Óskynsamlegt að formæla kjósendum sem fara-skynsamlegra að leita skýringa á því af hverju þeir fóru

Staða brezka Íhaldsflokksins að loknum kosningum til Evrópuþingsins er umhugsunarverð. Í þeim kosningum fékk Ukip (Sjálfstæðisflokkur Bretlands) 27,5% atkvæða, Verkamannaflokkurinn fékk 25,4% en Íhaldsflokkurinn í því þriðja með 23,9%. Frjálslyndi flokkurinn fékk svo 6,9% og lenti í fjórða sæti og þurrkaðist nánast út á Evrópuþinginu.

Eins og venjulega þegar nýir flokkar ögra þeim sem fyrir eru heyrast þær raddir meðal íhaldsmanna í Bretlandi að kjósendur muni skila sér aftur til flokksins í þingkosningum á næsta ári.

Ný könnun sem Daily Telegraph segir frá (það blað sem alla tíð hefur verið í nánustum tengslum við Íhaldsflokkinn) bendir til annars. Hún er vísbending um að 86% þeirra sem kusu Ukip nú ætli að gera það aftur á næsta ári. Sundurgreint eru tölurnar þær að 37% þeirra, sem kusu Ukip nú séu ákveðnir í að kjósa flokkinn aftur í þingkosningum og 49% töldu það líklegt. En 14% töldu sennilegt að þeir mundu kjósa annan flokk.

Ukip fékk 4,3 milljónir atkvæða í kosningunum til Evrópuþingsins. Það er augljóslega óvarlegt af forystumönnum Íhaldsflokksins eða annarra flokka að tala niður til Ukip vegna þess að kjósendur þess flokks munu taka slíkt tal til sín og herðast í þeirri afstöðu að kjósa Ukip aftur. David Cameron hefur kallað stuðningmenn Ukip „fruitcakes“ og „loonies“.

David Davies, þingmaður Íhaldsflokksins, sem bauð sig fram til formennsku í flokknum árið 2005, þegar Cameron var kjörinn til þeirra starfa, segir í samtali við Daily Telegraph að úrslitin hljóti að teljast aðvörun til Íhaldsflokksins. Um sé að ræða mjög skýra yfirlýsingu frá stórum hópi kjósenda um að þeir séu óánægðir með flokkinn.

Það er margt áþekkt með stöðu Íhaldsflokksins í Bretlandi og Sjálfstæðisflokksins á Íslandi, þótt hinn síðarnefndi hafi ekki staðið frammi fyrir samkeppni frá hægri eins og Íhaldsflokkurinn hefur gert og gerir.

Og eitt af því versta sem forystumenn flokka lenda í sem verða fyrir slíku tapi er að formæla þeim kjósendum, sem yfirgefa flokkana. Slíkar formælingar skila þeim ekki aftur. Skynsamlegra er að leita svara við því hvers vegna þeir fóru og hvað þurfi til að fá þá til baka.