Þriðjudagurinn 15. febrúar 2011
| « 14. febrúar |
■ 15. febrúar 2011 |
» 16. febrúar |
Hernaðargeta Rússa mjög takmörkuð
Rússar gætu haldið úti takmörkuðu stríði á einum vígstöðvum við vesturlandamæri sín en ekki einu í vestri og öðru í austri á sama tíma að því er fram kemur í leynilegri greiningu Atlantshafsbandalagsins á hernaðargetu Rússlands og sagt var frá í Aftenposten í gær byggt á gögnum frá Wikileaks.
Eamon Gilmore, formaður Verkamannaflokksins á Írlandi sagði í sjónvarpskappræðum formanna írsku stjórnmálaflokkanna í gærkvöldi, að írsku bankarnir hefðu sjálfir framið mesta bankarán í sögu írska lýðveldisins. Irish Times segir í dag að þetta hafi verið besta setning kvöldsins.
Nauðsyn aðgátar í útlendingamálum
Eftir byltinguna í Túnis hefur straumur flóttafólks eða ólöglegra innflytjenda frá strönd landsins yfir til ítölsku Miðjarðarhafseyjunnar Lampedusa margfaldast. Ítölsk stjórnvöld vildu bregðast við vandanum með því að senda ítalska landamæraverði eða lögreglumenn til Túnis. Því hafnaði bráðabirgðastjórnin í Túnis.
Þingflokkur Sjálfstæðisflokksins á varasamri braut
Þingflokkur Sjálfstæðisflokksins á í einhverjum erfiðleikum með þá hugsun, að þjóðin sjálf, þeir sem eiga að borga, taki hina endanlegu ákvörðun í Icesave-málinu. Þetta kom fram í gær, þegar tillaga Þórs Saari, þingmanns Hreyfingarinnar um þjóðaratkvæði var felld í fjárlaganefnd Alþingis en þrír þingmenn Sjálfstæðisflokksins í nefndinni sátu hjá.