Laugardagurinn 9. febrúar 2013

Menntamála­ráðherra Þýskalands segir af sér vegna ásakana um ritstuld í doktorsritgerð

Annette Schavan, menntamála­ráðherra Þýskalands, hefur sagt af sér vegna ásakana um ritstuld við gerð doktorsritgerðar. Hún er annar ráðherra í ríkis­stjórn Angelu Merkel sem segir af sér vegna slíkra ásakana.

Norska konungsfjölskyldan segir Se og Hør stríð á hendur

Norska konungsfjölskyldan hefur harðlega gagnrýnt vikublaðið Se og Hør fyrir að birta óviðurkvæmilegar myndir af fólki úr fjölskyldunni. Segist hún ekki sætta sig við að fá ekki að vera í friði fyrir paparazzi-ljósmyndurum. Þeir eigi að hafa sig hæga og láta þá í friði sem njóti frídaga í baðfötum á ströndinni.

Bandaríkin: Reiði vinstrisinna í garð Obama magnast vegna fjarstýrðra flugfara, mannréttindabrota og óvildar í garð uppljóstrara

Vinstrisinnar í Bandaríkjunum gagnrýna Barack Obama Bandaríkjaforseta harðlega fyrir stefnu hans í þjóðar­öryggismálum sem þeir segja að sé öfgafyllri og íhaldssamari en stefna sem George W. Bush fylgdi sem forseti. Þessi harða gagnrýni birtist að sögn breska blaðsins The Guardian víða og af vaxandi...

Le Figaro: François Hollande kemur illa leikinn frá fjárlagagerð ESB - Merkel og Cameron höfðu betur

François Hollande Frakklandsforseta mistókst að verja stöðu sína við gerð fjárlaga ESB til ársins 2020 gegn sókn Davids Camerons, forsætis­ráðherra Breta, sem naut stuðnings Angelu Merkel Þýskalandskanslara. Þetta er mat blaðsins Le Figaro sem styður ekki franska sósíalista.

Norðurslóðir: Áform um járnbraut frá Rovaniemi til Kirkenes

Áform eru uppi um að leggja járnbraut frá Rovaniemi í Finnlandi til Kirkenes í Noregi og er talið að markaður geti verið fyrir um 40 lestarferðir á dag. Slík járnbraut mundi greiða fyrir útflutningi á járngrýti frá Finnlandi og innflutningi á gasi. Uppbygging Kirkenes sem miðstöð flutninga á þessu svæði mundi hafa jákvæð áhrif um allan Norður-Noreg að sögn Barents Observer.

Írland: Fianna Fáil stærsti flokkurinn á ný

Fianna Fáil, sem lengi var leiðandi stjórnmála­flokkur á Írlandi en varð illa úti í fjármálakreppunni haustið 2008 er að ná sér á strik að því er fram kemur í Irish Times í dag. Ný skoðanakönnun sýnir að flokkurinn er á ný orðinn stærsti stjórnmála­flokkur á Írlandi og hefur bætt við sig 5 prósentustigum frá því í október.