Nú má Össur fara að vara sig-hann er í skotmáli

mbl.is

Össur Skarphéðinsson og Jóhanna Sigurðadóttir.

Enn æsist leikurinn í Samfylkingunni. Á Alþingi í gær lýsti Jóhanna Sigurðardóttir því yfir að Össur Skarphéðinsson, utanríkisráðherra og fyrrverandi formaður Samfylkingar, gæti verið með vangaveltur um framtíðarleiðtoga flokksins „út og suður“, „eins og honum sýndist“, að því er fram kemur í fréttum RÚV.

Tónninn í garð Össurar fer ekki fram hjá neinum. Þeim fjölgar stöðugt í forystusveit Samfylkingar, sem Jóhanna sendir „út og suður“. Fyrst var Ingibjörg Sólrún Gísladóttir send út í hafsauga. Hún er gleymd. Hana má ekki nefna. Óhugsandi var að sýna henni einhvern trúnað heima fyrir. Að lokum tókst að finna fyrir hana starf - í Afganistan.

Næst var Kristján Möller sendur út í kuldann. Hann lét ekki að stjórn. Í kjölfarið var Árna Páli sparkað. Hann lét heldur ekki að stjórn. Með honum fylgdi Kristrún Heimisdóttir-varasöm kona.

Svo kom röðin að Ástu Ragnheiði. Það er flóknara að losna við hana. Hún hefur líklega þingmeirihluta á bak við sig, þótt það sé annar meirihuti en sá, sem Jóhanna styðst við.

Nú er komið að Össuri. Nú má hann fara að vara sig. Það getur verið hættulegt fyrir Össur að vera of mikið í útlöndum á næstunni. Það er auðveldara að grafa undan þeim, sem eru mikið í burtu.

En yfirlýsingar Jóhönnu í gær, nokkrum vikum eftir að Össur lét orð falla um nauðsyn á nýrri forystu í Samfylkingu, sem Jóhanna hefur ekki sagt orð um til þessa, benda til að Össur sé næstur á dagskrá.

Undirbúningur að brennimerkingu hans er hafinn.

Það getur hins vegar orðið erfitt að framkvæma hana. Össur er hættulegur. Reynslan sýnir að hann hefur mörg pólitísk líf.

Kannski fleiri en Jóhanna?

SG