Verður gríska þingið flutt frá Aþenu til Brussel?

Gerard McGovern

Þinghúsið í Aþenu

Nú eru umræður um málefni Grikklands, sem staðið hafa nær samfellt í tvö ár innan Evrópusambandsins komnar á nýtt stig. Nú er það tillaga Þjóðverja samkvæmt fréttum bæði Financial Times og Reuters-fréttastofunnar í dag, að stjórn fjármála Grikkja verði tekin úr þeirra höndum. Reuters kveðst hafa heimildir fyrir þessu innan ESB. Financial Times segist hafa undir höndum skjöl, sem sýni að Þjóðverjar hafi lagt fram tillögur um skipun sérstaks fulltrúa innan framkvæmdastjórnar ESB, sem hafi með fjárlög evruríkjanna að gera. Þessi fulltrúi hafi neitunarvald um einstakar ákvarðanir viðkomandi þjóðþinga í fjárlagagerð.

Í þessum hugmyndum felst í raun og veru, að fullveldi Grikkja yrði af þeim tekið. Nú geta einhverjir sagt að þeir hafi haldið á fjármálum sínum á þann veg, að þeir hafi misst það nú þegar. Það kann eitthvað að vera til í því. Þó er munur á því, hvort þjóð situr við samningaborð með lánardrottnum sínum og semur við þá eða hvort hún tekur við beinum fyrirmælum frá Brussel og þaðan komi einfaldlega nei ef gríska þingið tekur fjárlagaákvarðanir, sem einum manni í Brussel þóknast ekki.

Þetta jafngildir því að gríska þingið verði lítil deild í höfuðstöðvum ESB í Brussel.

Með þessum tillögu Þjóðverja, sem ganga verður út frá að liggi fyrir, miðað við fréttir ofangreindra fjölmiðla, er þróun Evrópusambandsins komin á alveg nýtt stig. Fram að þessu hafa tillögur um svo algert afsal fullveldis einstakra ríkja ekki legið fyrir. Nú liggja þær fyrir og miðað við þær fréttir sem berast af málefnum Grikklands og fleiri aðildarríkja evrusvæðisins eins og t.d. Portúgals er alveg eins líklegt að þær verði að veruleika. Forráðamenn Evrópusambandsins eru að niðurlotum komnir. Þeir hafa ekki fleiri hugmyndir til að spila út og þeir hafa ekki meiri peninga vegna þess að Þjóðverjar eru staðfastir í því að neita frekari fjárframlögum.

Enn einu sinni skal því spurt:

Hvenær ætlar Alþingi Íslendinga að efna til ítarlegra og alvarlegra umræðna á sínum vettvangi um aðildarumsókn Íslands í ljósi þeirrar þróunar Evrópusambandsins, sem við blasir?

SG