Það er ekki bara eyðimörk á Alþingi

Í grein í Daily Telegraph í gær (eða fyrradag) sagði Ambrose Evans-Pritchard, alþjóðlegur viðskiptaritstjóri blaðsins miklar líkur á því, að grískir kjósendur mundu henda hinni ráðandi stétt í öllum stjórnmálaflokkum út í yztu myrkur í þingkosningum, sem væntanlega fara fram í apríl. Í umræðum manna á meðal hér á Íslandi hafa margir haft á orði, að nauðsynlegt væri að alveg yrði skipt um áhöfn á Alþingi og að nýtt fólk kæmi inn á þing. Ósagt skal látið hvort það á eftir að gerast í prófkjörum og þingkosningum að ári, sem Evans-Pritchard spáir að gerist í Grikklandi.

Hitt er ljóst að þrátt fyrir gagnrýni á þingmenn hafa nokkrir úr hópi nýrra og yngri þingmanna náð að skera sig úr og um einn hinna eldri má segja, að hann sé nánast ómissandi en það er Pétur Blöndal, alþingismaður Sjálfstæðisflokksins. Hvort sem menn eru sammála Pétri eða ósammála er mikilvægt að rödd hans heyrist á Alþingi vegna þess, að hann nálgast viðfangsefni líðandi stundar yfirleitt úr allt annarri átt en aðrir þingmenn.

Í röðum eldri þingmanna í þingflokki Sjálfstæðisflokksins er ljóst, að auk Péturs Blöndals hefur Einar K. Guðfinnsson styrkt stöðu sína mjög með jarðbundnum málflutningi. Hann getur átt eftir að verða forystusveit Sjálfstæðisflokksins drýgri en enginn, svo notað séu orð, sem Lúðvík heitinn Jósepsson viðhafði á göngum Alþingis fyrir mörgum áratugum, þegar um það var rætt hvort Jóhann Hafstein ætti að taka við forystu Sjálfstæðisflokksins til frambúðar.

Tveir ungir menn í þeim þingflokki hafa vakið athygli, Birgir Ármannsson, sem er einhver bezti greinandi á stöðu stjórnmála á Alþingi og Illugi Gunnarsson, sem byggir málflutning sinn meira á úthugsaðri hugmyndafræði en flestir aðrir þingmenn. Eftir tveimur ungum konum er tekið í þingflokki Sjálfstæðisflokksins vegna vasklegrar framgöngu en það eru Unnur Brá Konráðsdóttir og Ragnheiður Elín Árnadóttir.

Ungur þingmaður í þingflokki Samfylkingar, Magnús Orri Schram, er líklegur til að láta meira að sér kveða. Hann talar skynsamlega og málflutningur hans er geðfelldur.

Þingflokki Framsóknarflokksins er verulegur styrkur að þeim Gunnari Braga Sveinssyni og Ásmundi Einari Daðasyni, sem báðir eru framtíðarmenn á vettvangi stjórnmálanna. Hér á Evrópuvaktinni hefur áður verið bent á að þrjár konur hafi náð að skapa sér nokkra sérstöðu á þingi en það eru Lilja Mósesdóttir, Vigdís Hauksdóttir og Margrét Tryggvadóttir, hver með sínum hætti.

Að auki fer ekki á milli mála, að Guðfríður Lilja Grétarsdóttir er í hópi hæfileikamestu þingmanna á Alþingi nú um stundir.

Þegar horft er til Alþingis úr fjarlægð er því ljóst, að í öllum flokkum er mannval að finna, þótt tæpast fari á milli mála, að það kæmi sér vel bæði fyrir þing og þjóð að töluverðar mannabreytingar verði þar í næstu kosningum. Það þýðir þó ekki að þar sé bara eyðimörk þessa stundina.

SG