Falskur tónn í danskri hvatningu um ESB-aðild Íslendinga til að taka ákvarðanir með öðrum

Danska ríkisstjórnin hefur fallið frá áformum um að bera undir Dani í þjóðaratkvæðagreiðslu hvort þeir vilji falla frá fyrirvörum á ESB-aðild sinni varðandi samstarf á sviði varnarmála og lögreglu-og dómsmála. Danir hafa einnig fyrirvara varðandi aðild að evru-samstarfinu. Ríkisstjórnin hafði ekki áform um að leita álits þjóðarinnar á gildi hans. Hún vissi þegar hún var mynduð síðla árs 2011 að það þýddi ekkert, evru-aðild yrði hafnað.

Lene Espersen

Áætlun dönsku stjórnarinnar var þessi: Danir fara með formennsku innan ESB frá 1. janúar 2012 til 1. júlí 2012. Yfirvöldum ferst það svo vel úr hendi að danskur almenningur öðlast nýja trú á ESB-aðildinni. Hin mikla hrifningaralda verður virkjuð til að fá fyrirvarana afnumda í þjóðaratkvæðagreiðslu.

Staðan nú er þessi: Danir eru að kveðja formannsstól ráðherraráðs ESB. Óróleiki innan ESB er svo mikill að Helle Thorning-Schmidt forsætisráðherra telur ekki óhætt að efna til þjóðaratkvæðagreiðslu, hún óttast að tillaga hinnar pólitísku elítu um að falla frá ESB-fyrirvörunum yrði felld.

Sérfræðingur í ESB-málum við Kaupmannahafnarháskóla segir af þessu tilefni að frestun þjóðaratkvæðagreiðslu nú jafngildi því að hún verði aldrei um fyrirvarana, Danir muni standa frammi fyrir mun stærra viðfangsefni, nýju ESB með breyttum sáttmála. Ef þeir þori ekki í þessa atkvæðagreiðslu nú sé enn ólíklegra að þeir þori í hina næstu. Þeir muni því standa utan kjarna ESB-samstarfsins og lenda í sömu stöðu og Norðmenn og Íslendingar, þeir muni afrita það sem gerist á fundum þar sem ákvarðanir verði teknar.

Sama dag og þessar fréttir berast frá Danmörku tekur Kolbeinn P. Óttarsson, blaðamaður á Fréttablaðinu, viðtal við Lene Espersen, formann Evrópunefndar danska þingsins, sem hér er á ferð. Hún er fyrrverandi formaður danska Íhaldsflokksins og fyrrverandi utanríkisráðherra. Henni var þröngvað úr formannsstólnum af því að hún sætti svo mikilli gagnrýni fyrir störf sín sem utanríkisráðherra.

Hræðsluáróður Lene Espersen til að lokka Íslendinga til ESB-aðildar er að án hennar standi Íslendingar áfram fjarri töku ákvarðana og afriti með Norðmönnum skjöl af fundum þeirra sem þær taki. Þá verði örugglega unnt að finna sérlausnir fyrir Íslendinga, hún sé bara viss um það.

Frá því að umsóknarferlið hófst hafa margir stjórnmálamenn frá ESB-löndum komið hingað og kyrjað sama söng og Lene Espersen. Tónninn er þó falskastur hjá henni þegar litið er til þess að henni og öðrum dönskum stjórnmálaforingjum hefur mistekist í eigin landi að sporna gegn þeirri þróun að þeir sitji sjálfir við ljósritunarvélar utan fundarsalanna þar sem ákvarðanir eru teknar.

Dönum tókst ekki einu sinni að nýta formannsaðstöðu sína innan ESB til að búa svo í haginn fyrir danska hagsmuni að elítan þyrði að leggja ESB-fyrirvara í dóm kjósenda. Það skyldu þó einhverjir aðrir en Danir ráða ferðinni innan ESB þótt danskur ráðherra stjórni fundunum?

Bj. Bj.