Hætta á umhverfisslysum fylgir aukinni athafnasemi á norðurslóðum

Danska utanríkisráðuneytið

Í fréttum Evrópuvaktarinnar í dag kemur fram, að umhverfisyfirvöld í Noregi hafi áhyggjur af því hvað geti gerzt, þegar olíuleit á hafsbotni við Jan Mayen fer í fullan gang, sem búast má við á næstu árum. Þau benda á, að jafnvel minni háttar olíuleki geti haft meiriháttar áhrif á þessu svæði og vísa þá bæði til fiskistofna og fuglalífs og náttúru að öðru leyti.

Ekki þarf að hafa mörg orð um að þau neikvæðu áhrif geta náð til Íslands alveg eins og afleiðingar meiri hátta olíuslyss við Skotland eða Færeyjar geta náð til Íslands.

Nú skal ekki dregið í efa, að umhverfisyfirvöld á Íslandi fylgist vel með þessum málum og þróun þeirra í nálægum löndum en spurning er, hvort þau þurfi ekki að miðla upplýsingum um þær umræður og viðræður í ríkara mæli til almennings.

Nú horfir fólk með vongleði til þess að olíufundir norður af Íslandi geti haft þýðingu fyrir okkur en það má ekki gleyma neikvæðum afleiðingum alvarlegra mistaka.

Fiskistofnarnir við Ísland eru þar að auki að flytja sig norður á bóginn.

Það er augljóst að athafnasemi á þessu sviði mun stóraukast á næstu árum. Þess vegna er orðið tímabært að þjóðin vakni til vitundar um þær hættur, sem geta verið samfara þeirri þróun.

SG