Jón Bjarnason úthrópaður á Eyjunni

Spunaliðar Samfylkingarinnar hafa tekið til við að útmála Jón Bjarnason, þingmann VG, eins og sjá má á ritstjórnardálki Eyjunnar, mánudaginn 27. ágúst, þar sem segir:

Steingrímur J. Sigfússon og Ögmundur Jónasson faðmast í vináttuskyni fyrir átakafund í þingflokki VG. Jón Bjarnason gleðst yfir vináttunni.

„Ummæli Jóns Bjarnasonar um “sanna ESB andstæðinga„ í fréttum Ríkisútvarpsins í gær vöktu nokkra athygli. Orðið á götunni er að óvíst sé hvort Jón uppfylli sjálfur ítrustu skilyrði þess að teljast til sannra ESB andstæðinga. Ýmislegt megi nefnilega tína til sem sýni að Jón hafi ekki alltaf verið jafn hreintrúaður.

Áður en að Jón fór á þing fyrir Vinstri Græna gaf hann til dæmis á kost á sér í prófkjöri Samfylkingarinnar, en tapaði naumlega fyrir Kristjáni Möller, núverandi þingmanni flokksins. Samfylkingin var þá að slíta barnsskónum sem sá evrópusinnaði flokkur átti eftir að setja ESB-aðild á dagskrá íslenskra stjórnmála.

Við myndun ríkisstjórnar VG og Samfylkingar 2009 studdi Jón svo stefnuyfirlýsingu ríkisstjórnarinnar sem fól í sér aðildarviðræður við ESB.

Í fyrra studdi Jón enn fremur að Ísland veitti viðtöku svokölluðum IPA-styrkjum frá Evrópusambandinu. Þeir styrkir hafa einmitt verið þyrnir í augum sannra ESB andstæðinga og oft uppnefndir sem mútufé. Orðið á götunni er að erfitt geti verið fyrir Jón að útskýra þessa fortíð sína á næsta fundi hjá „sönnum“ ESB-andstæðingum.“

Þessi klausa á Eyjunni minnir helst á frásagnir í bókum sagnfræðinga um kommúnistaflokka þar sem efnt var til funda til að úthrópa þá sem flokksforystan taldi að hefðu farið út af línunni frá Moskvu. Nú tíðkast slíkir fundir ekki lengur heldur nota menn nafnlausa netdálka til úthrópunar og samfylkingarmenn taka að sér að vinna verkin í nafni hins langlífa stjórnarsamstarfs – meira að segja Jón Bjarnason spilar þar með þrátt fyrir allt

Bj. Bj.