Enn afhjúpast tvöfeldni Steingríms J. - orkumála­stjóri segir hann fara með rangt mál um olíuvinnslu

Því fleiri fréttir sem sagðar eru af ákvörðunum ríkisstjórnar Íslands varðandi rannóknir og leit vegna olíu því betur kemur ósannsögli Steingríms J. Sigfússonar, atvinnumála- og nýsköpunarráðherra, vegna málsins í ljós.

Á mbl.is þriðjudaginn 8. janúar er rifjað upp að í Spegli ríkisútvarpsins mánudaginn 7. janúar hafi Steingrímur J. sagt, „að þrátt fyrir sérleyfi til rannsókna og vinnslu kolvetnis á Drekasvæðinu væri ekki í hendi að leyfi fyrir frekari vinnslu og borunum fengist“.

Drekasvæðið

Mbl.is ber þessi ummæli ráðherrans undir Guðna A. Jóhannesson orkumálastjóra sem segir „að ef fyrirtækin uppfylli öll skilyrði varðandi umhverfis- og öryggismál eigi ekkert að koma í veg fyrir borunarleyfi, svo framarlega sem olía finnist.“

Í Speglinum 7. janúar sagði Steingrímur J.:

„Þetta er leitar- og rannsóknarþáttur með öllum fyrirvörum af okkar hálfu varðandi umhverfis- og öryggismálin á þessu svæði. Þetta jafngildir ekki ákvörðun um að leyfa boranir eða vinnslu þarna.“

Taldi ráðherrann að fyndist olía þyrfti í framtíðinni að taka ákvörðun um hvort leyfa ætti boranirnar, það væri miklu stærri ákvörðun en rannsóknarleyfin. Hvert og eitt skref færi í umhverfismat og ákvörðunin lægi langt inni í framtíðinni.

Á mbl. kemur fram að orkumálastjóri telji aftur á móti að ekki sé hægt að neita fyrirtækjum sem fengið hafa rannsóknar- og vinnsluleyfi um frekari boranir ef olía finnist og þau uppfylli öll skilyrði um umhverfis- og öryggismál. Segir hann að huglægt mat sem ekki hafi málefnalegar ástæður gætu hugsanlega skapað skaðabótaskyldu á hendur ríkinu.

Gunnlaugur Jónsson, annar eiganda Kolvetna ehf., sem er á bakvið eina af umsóknunum um sérleyfi, segir í samtali við mbl.is að ekki sé hægt að taka réttinn af mönnum núna til að vinna olíu sem hugsanlega finnist. „Stóra hugmyndin með sérleyfinu er að menn hljóta heimild til að vinna olíuna. Það er forsenda þess að farið sé í þetta stig að menn hafi vinnsluleyfi,“ segir Gunnlaugur. Hann telur „ekki hægt sem pólitísk ákvörðun [svo] héðan af að taka af fyrirtækjum réttinn til að vinna olíuna sem þau kunna að finna.“

Eins og bent hefur verið á hér á Evrópuvaktinni er aðferð Steingríms J. í olíumálum hin sama og í ESB-málum. Hann segist standa að allt öðrum ákvörðunum en teknar hafa verið með samþykki hans. Í umsókn að ESB felst pólitísk ákvörðun um að aðild að ESB. Í veitingu sérleyfis til olíuleitar felst pólitísk ákvörðun um rétt leyfishafa til að vinna olíu sem hann finnur. Í báðum þessum málum vill Steingrímur J. ekki kannast við afleiðingar gerða sinna.

Það er með ólíkindum að fréttastofa ríkisútvarpsins flytji fagurgala Steingríms J. um olíumálin eins og um framlag til málefnalegrar umræðu sé að ræða það er álíka frumlegt og trúa fagurgalanum um að Steingrímur J. hafi einhendis bjargað Íslandi frá gjaldþroti.

Bj. Bj.